áætlun um vernd og orkunýtingu landsvæða.
Virðulegi forseti. Ég þakka hv. þingmanni fyrir góða ræðu og tek undir margt af því sem þar kom fram. Við stöndum frammi fyrir því alvarlega ástandi sem samfélag okkar er í eftir þetta hrun — mikið atvinnuleysi, mismunandi eftir greinum en áberandi mikið á þeim vettvangi sem er í verktakaiðnaði — og á sama tíma hafa blasað við okkur þeir virkjunarkostir og þær auðlindir sem landið býður upp á til að stíga mikilvæg skref í átt að því að rétta úr kútnum. Á það hefur ítrekað verið bent að sóknarfæri okkar liggi fyrst og fremst á þessum vettvangi og það með fullum rökum. Þær atvinnugreinar sem ganga vel í dag, eins og ferðaþjónusta o.fl., duga hreinlega ekki til að draga vagninn.
Mig langar að biðja þingmanninn að bregðast við þeirri spurningu hvernig hann meti efnahagsleg áhrif niðurstöðu ráðherranna í þeirri tillögu sem hér liggur fyrir. Hvaða áhrif mun það hafa á samfélag okkar að okkur séu í raun allar bjargir bannaðar, samkvæmt þessari tillögu, að stíga þessi nauðsynlegu skref? Hvernig metur hann afleiðingar þess fyrir íslenskt samfélag?