Ferill 290. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 749 — 290. mál.
Svar
dómsmálaráðherra við fyrirspurn frá Oddnýju G. Harðardóttur um málsmeðferðartíma umsókna um alþjóðlega vernd.
1. Hver er meðalmálsmeðferðartími umsókna um alþjóðlega vernd í dögum talið á ári hverju frá árinu 2020 hjá Útlendingastofnun og kærunefnd? Annars vegar er óskað svars um meðalmálsmeðferðartíma allra umsókna og hins vegar sundurliðun eftir tegundum mála.
Tafla 1. Meðalmálsmeðferðartími allra umsókna í fyrstu málsmeðferð hjá Útlendingastofnun í dögum talið (frá umsókn til ákvörðunar), án fjöldaflótta frá Úkraínu.
Ár | Dagar |
2020 | 127 |
2021 | 87 |
2022 | 124 |
15.10.2023 | 169 |
Tafla 2. Meðalmálsmeðferðartími í fyrstu málsmeðferð hjá Útlendingastofnun eftir tegund málsmeðferðar í dögum talið (frá umsókn til ákvörðunar).
Ár | Efnismeðferð | Dyflinnarmál | Öruggt þriðja ríki | Vernd í öðru ríki | Fjöldaflótti frá Úkraínu |
2020 | 134 | 118 | 274 | 95 | – |
2021 | 79 | 94 | 83 | 102 | – |
2022 | 125 | 105 | 153 | 123 | 5 |
15.10.2023 | 186 | 123 | 148 | 120 | 5 |
Tafla 3. Meðalmálsmeðferðartími allra umsókna í fyrstu málsmeðferð hjá kærunefnd útlendingamála í dögum talið.
Ár | Dagar |
2020 | 83 |
2021 | 74 |
2022 | 48 |
1.10.2023 | 104 |
Tafla 4. Meðalmálsmeðferðartími í fyrstu málsmeðferð hjá kærunefnd útlendingamála eftir tegund málsmeðferðar í dögum talið. Vakin er athygli á að „örugg þriðju ríki“ eru flokkuð undir „vernd í öðru ríki“ hjá kærunefnd.
Ár | Efnismeðferð | Dyflinnarmál | Vernd í öðru ríki |
2020 | 91 | 65 | 88 |
2021 | 79 | 72 | 73 |
2022 | 50 | 45 | 50 |
1.10.2023 | 125 | 109 | 77 |
2. Hver er meðalmálsmeðferðartími umsókna frá ríkisborgurum Venesúela um alþjóðlega vernd í dögum talið á hverju ári frá árinu 2019 hjá Útlendingastofnun og kærunefnd?
Tafla 5. Meðalmálsmeðferðartími umsókna frá ríkisborgurum Venesúela í fyrstu málsmeðferð hjá Útlendingastofnun í dögum talið (frá umsókn til ákvörðunar).
Ár | Dagar |
2019 | 45 |
2020 | 39 |
2021 | 58 |
2022 | 113 |
15.10.2023 | 212 |
Hinn 1. október sl. hafði kærunefnd útlendingamála afgreitt fjögur mál frá ríkisborgurum Venesúela á árinu 2023 og í þeim var meðalmálsmeðferðartíminn 155 dagar.
3. Með hvaða hætti hefur verið brugðist við lengri málsmeðferðartíma hjá Útlendingastofnun og kærunefnd?
Útlendingastofnun fékk heimild til þess að ráða fleira starfsfólk á síðasta ári og aftur síðastliðið vor til að mæta auknum málafjölda. Stofnunin bætti við sig bæði sérfræðingum og lögfræðingum í vinnslu mála. Þá fékk kærunefnd útlendingamála einnig heimild haustið 2023 til að bæta við sig fleiri lögfræðingum.
4. Hvað skýrir að mati ráðherra lengri málsmeðferðartíma umsókna um alþjóðlega vernd?
Líkt og greinir í töflu 1 var meðalmálsmeðferðartími umsókna um alþjóðlega vernd í fyrstu málsmeðferð hjá Útlendingastofnun, að undanskildum umsóknum vegna fjöldaflótta frá Úkraínu, rúmur fimm og hálfur mánuður (169 dagar) hinn 15. október síðastliðinn. Þetta er umtalsverð lenging frá árinu 2021 þegar meðalmálsmeðferðartíminn var undir þremur mánuðum (87 dagar). Stuttur málsmeðferðartími þá skýrist fyrst og fremst af fækkun umsókna á tímum COVID og hraðri afgreiðsla umsókna frá Venesúela á árunum 2020–2022. Að sama skapi skýrist lenging meðalmálsmeðferðartímans nú fyrst og fremst af verulega mikilli fjölgun umsókna, hléi sem gert var á afgreiðslu umsókna frá Venesúela frá desember 2022 til mars 2023, breyttri framkvæmd í kjölfarið sem og miklu magni óafgreiddra umsókna sem safnaðist upp á meðan.