Ferill 431. máls. Aðrar útgáfur af skjalinu: Word Perfect.
1993–94. – 1063 ár frá stofnun Alþingis.
117. löggjafarþing. – 431 . mál.
643. Tillaga til þingsályktun
arum fullgildingu fríverslunarsamnings milli ríkja Fríverslunarsamtaka Evrópu og Búlgaríu.
(Lögð fyrir Alþingi á 117. löggjafarþingi 1993–94.)
Alþingi ályktar að heimila ríkisstjórninni að fullgilda fyrir Íslands hönd fríverslunarsamning milli Fríverslunarsamtaka Evrópu (EFTA) og Búlgaríu sem gerður var í Genf 29. mars 1993.
Athugasemdir við þingsályktunartillögu þessa.
Á árinu 1990 var ákveðið að hefja samningaviðræður um fríverslunarsamning milli EFTA-ríkjanna og Póllands, Ungverjalands, Tékklands og Slóvakíu. Samningaviðræðum við öll þessi ríki er lokið með gerð fríverslunarsamninga. Samningaviðræður milli EFTA-ríkjanna og Búlgaríu og Rúmeníu um fríverslunarsamninga hófust á árinu 1992. Fríverslunarsamningur milli EFTA-ríkjanna og Búlgaríu var undirritaður 29. mars 1993. Samningurinn milli EFTA-ríkjanna og Búlgaríu er birtur sem fskj. I með þingsályktunartillögu þessari. Í fskj. II er birt bókun um samkomulag um framkvæmd ýmissa þátta samningsins og í fskj. III er að finna tvíhliða landbúnaðarsamning Íslands og Búlgaríu. Nokkrir viðaukar við fríverslunarsamninginn við Búlgaríu eru staðlaðir fyrir alla ofangreinda samninga og fylgja tillögum til þingsályktunar vegna þeirra samninga og eru því ekki í fskj. I.
Lagabreyting vegna þessa samnings er ekki nauðsynleg, sbr. heimild í 6. gr. tollalaga, til að láta koma til framkvæmda ákvæði fríverslunar- og milliríkjasamninga.
Fríverslunarsamningurinn við Búlgaríu er mjög hliðstæður þeim sem gerðir hafa verið við Pólland, Ungverjaland, Tékkland og Slóvakíu. Fríverslunarsamningurinn við Búlgaríu tryggir fríverslun milli einstakra EFTA-ríkja og Búlgaríu með iðnaðarvörur (25.–97. kafla í samræmdri vörulýsingar- og vöruheitaskrá), að undanskildum þeim vörum sem skráðar eru í I. viðauka samningsins. Jafnframt nær hann til ákveðinna vara sem unnar eru að hluta til eða öllu leyti úr landbúnaðarvörum. Þessar vörur eru sérstaklega tilgreindar og nánar kveðið á um framkvæmd þeirra í bókun A við samninginn. Einnig nær samningurinn til fisks og fiskafurða, sbr. C-lið 2. gr. og II. viðauka samningsins.
EFTA-ríkin afnema alla innflutningstolla á vörum sem upprunnar eru í Búlgaríu og gjöld sem hafa samsvarandi áhrif frá og með gildistöku samningsins, að undanskildum fáeinum vörum sem tilgreindar eru í III. viðauka þar sem nokkur EFTA-ríkjanna hafa lengri aðlögunartíma til að afnema tolla. Hér er einkum um að ræða textílvörur. Ísland hefur ekki sérstakan aðlögunartíma hvað þessa tolla varðar. Aðlögunartími Búlgaríu er til 31. desember 2002, sbr. 1. og 4. gr. og IV. viðauka samningsins. Fríverslun með fisk og fiskafurðir kemst á strax við gildistöku samningsins, sbr. 2. tölul. 1. gr. II. viðauka samningsins.
Sérstök bókun um samkomulag um framkvæmd ýmissa þátta samningsins var gerð samhliða samningnum. Í bókuninni eru ýmis túlkunaratriði og útfærslur á samningnum sem ekki þótti viðeigandi að hafa í megintexta hans.
Varðandi viðskipti með landbúnaðarvörur lýsa samningsríkin sig reiðubúin, að því marki sem stefna þeirra í landbúnaðarmálum leyfir, að stuðla að samfelldri þróun viðskipta með landbúnaðarvörur, sbr. 13. gr. samningsins. Til að ná þessu markmiði hafa EFTA-ríkin gert tvíhliða samninga við Búlgaríu til að greiða fyrir viðskiptum með landbúnaðarvörur. Hvað Ísland varðar er hér um að ræða vörur sem ekki eru framleiddar hér á landi, einkum ávexti. Að öðru leyti fellur landbúnaður fyrir utan samninginn.
Viðskipti Íslands og Búlgaríu eru ekki mikil. Á árunum 1990–1992 hefur nær einungis kísilgúr verið fluttur til Búlgaríu. Verðmæti útflutnings til Búlgaríu var á árinu 1990 24 milljónir, 1991 18,5 milljónir og 1992 17,7 milljónir.
Helstu innflutningsvörur frá Búlgaríu eru rafmagnsvélar, tæki og fatnaður. Verðmæti innflutnings var árið 1990 13,9 milljónir, 1991 14,3 milljónir og 1992 26,5 milljónir.
Tafla repró
Fylgiskjal I.
Samningur milli ríkja Fríverslunarsamtaka Evrópu og lýðveldisins Búlgaríu.
SAMNINGUR REPRÓ
..........
Með þingsályktunartillögu þessari voru birt þrjú fylgiskjöl.
Auk samningsins voru á fskj. I prentuð eftirtalin gögn: Tafla VII við bókun A, II. viðauki sem um getur í c-lið 2. gr. samningsins, IV. viðauki sem um getur í 3. mgr. 4. gr., tafla A við IV. viðauka, tafla B við IV. viðauka, X. viðauki sem um getur í 18. gr. og XII. viðauki.
Við umfjöllun utanríkismálanefndar þingsins kom í ljós að láðst hafði að prenta með samningnum bókun A um vörur sem um getur í b-lið 2. gr. samningsins, en hún tekur til ákveðinna vara sem unnar eru að hluta til eða að öllu leyti úr landbúnaðarvörum. Bókun A var því birt sem fylgiskjal með nefndaráliti um málið á þskj. 870. Rétt er að geta þess einnig að töflur I og VII við bókun A, sem birtar eru í þskj. 645 með samningnum við Rúmeníu, gilda einnig um samninginn við Búlgaríu, sbr. nefndarálit utanríkismálanefndar.
Á fskj. II var birt bókun um samkomulag um framkvæmd ýmissa þátta samningsins og á fskj. III tvíhliða landbúnaðarsamningur Íslands og Búlgaríu.
Einnig voru öll framangreind gögn prentuð í enskri þýðingu með þingsályktunartillögunni.
Um fylgiskjöl og fylgigögn vísast til þingskjalsins (lausaskjalsins). Enn fremur verður samningurinn ásamt bókunum og viðaukum prentaður í C-deild Stjórnartíðinda.
