Ferill 146. máls. Aðrar útgáfur af skjalinu: Word Perfect.
1994. – 1064 ár frá stofnun Alþingis.
118. löggjafarþing. – 146 . mál.
271. Svar
menntamálaráðherra við fyrirspurn Sigbjarnar Gunnarssonar um samskipti Lánasjóðs íslenskra námsmanna og stúdenta í Þýskalandi.
Samkvæmt upplýsingum frá Lánasjóði íslenskra námsmanna er ekki vitað til þess að íslenskir námsmenn hafi horfið frá námi í Þýskalandi vegna reglna Lánasjóðsins um námsframvindu.
Tekið skal fram að reglur LÍN um námsframvindu byggjast á opinberum upplýsingum um skipulag skóla á sama hátt og verið hefur um árabil. Þetta gildir um nám í Þýskalandi eins og alls staðar annars staðar. Lágmarksreglur um námsframvindu eru óbreyttar eins og þær hafa verið í meira en áratug, þ.e. að menn skili a.m.k. 75% árangri. Skólaárið 1992–93 breyttust reglur þannig að menn fá 100% lán einungis fyrir 100% námsframvindu samkvæmt skipulagi skóla en geta ekki fengið 100% lán fyrir 75–100% námsframvindu eins og áður. Eins og áður sagði er almenna lágmarkskrafan hin sama og fyrr, þ.e. menn þurfa að skila 75% af fullu námi hverju sinni til að teljast lánshæfir. Sú regla hefur verið tekin upp í tíð núverandi stjórnar sjóðsins að gefa mönnum, sem ljúka framhaldsskólanámi með viðamiklu verkefni, kost á aðstoð í eitt missiri umfram það sem fyrri reglur heimiluðu. Þessi regla nær til flestra íslenskra námsmanna í Þýskalandi og hefur aukið svigrúm þeirra.
Stjórn sjóðsins hafa í gegnum árin borist erindi frá einstaka námsmönnum í Þýskalandi, eða einstaka hópum námsmanna, og hefur hverju erindi verið svarað fyrir sig. Að öðru leyti hafa engar viðræður farið fram milli stjórnenda Lánasjóðsins og fulltrúa íslenskra námsmanna í Þýskalandi.