Guðrún Helgadóttir:
Hæstv. forseti. Hanes-hjónin frömdu ekki glæp, hvorki í Bandaríkjunum né hér á landi. Umhyggja fyrir litlu barni er ekki glæpur. Óvissa sú sem þau búa við og sonur þeirra er óbærileg og ómannúðleg.
Mér er ljóst að málið er ekki einfalt. Ég spyr: Gæti Alþingi hoggið á þennan hnút með því að veita þeim íslenskan ríkisborgararétt og íslenskt vegabréf sem fyrst, nú? Slíkt hefur verið gert hafi menn verið nýtilegir í boltaleiki af öllu tagi. Ég skora á hæstv. dómsmrh. að meta umhyggju fyrir litlu barni til jafns við hæfileika til að sparka eða kasta bolta.