![](http://www.althingi.is/myndir/althlit.gif)
Hjörleifur Guttormsson:
Virðulegur forseti. Hér liggur fyrir tillaga frá stjórnarmeirihluta um að breyta nýlega settum lögum um hollustuhætti og mengunarvarnir og þessi tillaga var til umræðu um fjögurleytið í nótt. Þar lá fyrir tillaga frá minni hluta, sem ég mæli fyrir, um að vísa málinu til ríkisstjórnarinnar. Aðalatriði frv. eru breytingar á setningu gjaldskráa en síðan fylgir brtt. um að atvinnurekendur og samtök þeirra fái heimild til þess að tilnefna fulltrúa í allar heilbrigðisnefndir með fullum réttindum. Allir hljóta að sjá að fyrirkomulag af þessu tagi gengur ekki og gengur gegn eðlilegri stjórnsýslu. Þeir aðilar sem á að hafa eftirlit með eiga að hafa full réttindi í eftirlitsnefndinni. Þetta er einhver fráleitasti gjörningur sem ég hef séð lengi og undarlegt að þeir vísu menn í meiri hluta nefndarinnar skuli standa að þessu.