Ferill 39. máls. Aðrar útgáfur af skjalinu: Word Perfect.
123. löggjafarþing 1998–99.
Þskj. 183 — 39. mál.
Svar
menntamálaráðherra við fyrirspurn Hjálmars Árnasonar um innheimtu gjalds fyrir endurtektarpróf.
Fyrirspurnin hljóðar svo:
1. Hvernig hefur ástundun nemenda í framhaldsskólum breyst eftir að hafin var gjaldtaka af nemendum sem þreyta endurtektarpróf?
2. Hefur orðið fækkun á nemendum sem falla í áfanga eða bekk á tímabilinu?
3. Hversu mikið fé hefur verið innheimt vegna þessa (sundurliðað eftir námsönnum og skólum)?
Þess skal getið að ákveðins misskilnings gætir í spurningunni því yfirleitt innheimta skólar ekki sérstakt gjald fyrir endurtektarpróf heldur greiða nemendur sem endurinnrita sig í bekkjardeild eða námsáfanga sérstakt endurinnritunargjald. Í eftirfarandi svari er tekið mið af endurinnritunargjaldi.
Þá ber að hafa í huga að skólum er ekki skylt að innheimta gjaldið heldur er þeim ,,heimilt að innheimta sérstakt endurinnritunargjald af nemendum við endurinnritun í bekkjardeild eða námsáfanga,“ eins og segir í 2. gr. reglugerðar um endurinnritunargjald, nr. 333/1997 frá 16. maí 1997. Fáeinir skólar hafa ekki nýtt sér þessa heimild.
Eftir að hafa athugað málið og leitað álits framhaldsskólanna er niðurstaða ráðuneytisins sú að of stuttur tími sé liðinn frá því að gjaldtaka hófst til að tölfræðilega sé hægt að meta áhrif hennar sem stjórntækis fyrir skólana. Að svo stöddu nefna flestir skólar að ekki sé hægt að greina merkjanlega breytingu á ástundun nemenda eftir að innheimta gjaldsins hófst. Einnig telja skólar að ekki sé marktækur munur á fjölda þeirra nemenda sem falla í áfanga eða bekk á tímabilinu miðað við stöðuna fyrir gjaldtöku. Allmargir skólar nefna að of stuttur tími sé liðinn frá því að gjaldtaka hófst til að hægt sé að meta reynsluna af áhrifum gjaldtökunnar. Þó er það til dæmis nefnt að í einum skóla hafi orðið vart við hugarfarsbreytingu hjá nemendum og foreldrum þeirra varðandi ástundun og fall og þar er jafnframt dregin sú ályktun að gjaldið veiti sumum nemendum aðhald. Einnig kemur fram það viðhorf að gjaldið sé svo lágt, í langflestum tilvikum mun lægra en andvirði einnar kennslubókar, að það hafi ekki mikil áhrif.
Eftirfarandi er yfirlit yfir gjaldtöku, skipt eftir skólum og önnum (önnin þegar greiðsla er innt af hendi):
haustönn 1997, kr. | vorönn 1998, kr. | haustönn 1998, kr. | |
Borgarholtsskóli | 230.000 | 260.000 | |
Fjölbrautaskóli Norðurlands vestra | 213.500 | 256.500 | 239.000 |
Fjölbrautaskóli Suðurlands | 369.500 | 393.500 | 349.000 |
Fjölbrautaskóli Suðurnesja | 418.500 | 336.000 | |
Fjölbrautaskóli Vesturlands | 221.500 | 330.000 | 297.000 |
Fjölbrautaskólinn Breiðholti | 1.063.000 | 934.000 | 874.000 |
Fjölbrautaskólinn í Garðabæ | 359.000 | 428.500 | 471.500 |
Fjölbrautaskólinn við Ármúla | 440.800 | 640.300 | |
Flensborgarskólinn | 428.000 | 441.000 | 390.500 |
Framhaldsskóli Vestfjarða | 78.500 | 64.000 | 120.500 |
Framhaldsskólinn á Húsavík | 27.500 | 5.500 | 73.000 |
Framhaldsskólinn á Laugum | 47.000 | 36.000 | |
Framhaldsskólinn í A-Skaftafellssýslu | (ekkert gjald innheimt) | ||
Framhaldsskólinn í Vestmannaeyjum | (ekkert gjald innheimt) | ||
Iðnskólinn í Hafnarfirði | (ekkert gjald innheimt) | ||
Iðnskólinn í Reykjavík | 552.500 | 639.500 | 706.500 |
Kvennaskólinn í Reykjavík | 81.000 | 24.000 | |
Menntaskólinn á Akureyri | 81.000 | ||
Menntaskólinn á Egilsstöðum | 124.000 | 237.000 | 165.000 |
Menntaskólinn að Laugarvatni | (ekkert gjald innheimt) | ||
Menntaskólinn í Kópavogi | 337.500 | 466.000 | 459.000 |
Menntaskólinn í Reykjavík | 81.000 | 105.000 | |
Menntaskólinn við Hamrahlíð | 801.500 | 594.000 | 642.000 |
Menntaskólinn við Sund | 111.000 | 117.000 | |
Stýrimannaskólinn í Reykjavík | 48.000 | 17.000 | 27.000 * |
Verkmenntaskóli Austurlands | 16.500 * | ||
Verkmenntaskólinn á Akureyri | 572.500 | 615.500 | ** |
Samtals | 5.888.000 | 6.475.800 | 6.093.000 |
* gjald fyrir endurtektarpróf ** upplýsingar liggja ekki fyrir |