Frsm. efh.- og viðskn. (Vilhjálmur Egilsson):
Virðulegi forseti. Ég mæli hér fyrir nál. um till. til þál. um setningu siðareglna í viðskiptum á fjármálamarkaði.
Nefndin sendi þetta mál til umsagnar og ræddi það á fundi og hefur ákveðið að gera tillögu um að þessi tillaga verði samþykkt með eftirfarandi breytingu:
,,Alþingi ályktar að fela viðskiptaráðherra að kanna hvort stofnanir og fyrirtæki á fjármálamarkaði hafi sett sér siðareglur í samræmi við tilmæli framkvæmdastjórnar ESB frá 25. júlí 1977 um siðareglur Evrópubandalaganna um viðskipti með framseljanleg verðbréf, 77/534/EBE, og almennt viðurkenndar meginreglur FIBV, Alþjóðasambands kauphalla, um viðskiptahætti í verðbréfaviðskiptum frá 1992. Ráðherra skili Alþingi skýrslu um niðurstöðu könnunarinnar í upphafi haustþings.``
Undir þetta rita allir hv. nefndarmenn.