Flm. (Guðmundur Árni Stefánsson) (um fundarstjórn):
Herra forseti. Ég hef skilning á því að forseti velti eilítið vöngum yfir því hvert þetta mál á að fara, þ.e. til hvaða fagnefndar. Ég sem 1. flm. þessa frv. velti eilítið vöngum yfir því sjálfur í framsögu í gær en að bestu manna yfirsýn varð niðurstaða sú, þó óhefðbundin væri, að allshn. hefði forræði á málinu í ljósi þess að málið er nátengt og raunar samtengt öðru dagskrármáli sem rétt í þessu var vísað til allshn. og laut að þingsköpum Alþingis. Með öðrum orðum hanga þessi tvö frumvörp hvort með öðru og voru rædd undir sama hatti í gær.
Ég er algerlega sáttur við það að menn setjist eilítið yfir það og skoði nánar með hliðsjón af þingsköpum og hefðum og venjum í þessu sambandi en legg megináhersluna á það að þessar tvær nefndir skoði þá málin í réttu samhengi.