Fyrirspyrjandi (Katrín Fjeldsted):
Herra forseti. Matvælastofnun Evrópu, The Food Safety Authority, sem staðsett verður í París, er ætlað að verða neytendum innan ESB öryggisventill. En eins og kunnugt er hafa nokkur alvarleg mál komið upp á undanförnum árum sem kalla á aukið eftirlit, aðhald og rannsóknir á matvælum. Samtök evrópskra lækna hafa bent á mikilvægi þess að slík stofnun búi yfir læknisfræðilegri þekkingu þar sem afleiðingar gallaðra matvæla, eitrana og sýkinga, séu heilbrigðisvandamál sem séu í verkahring lækna.
En ég vil spyrja hæstv. umhvrh.:
1. Munu Íslendingar koma að starfi Matvælastofnunar Evrópu samkvæmt EES-samningnum?
2. Er læknisfræðileg þekking nýtt í eftirliti með mat hér á landi?
3. Telur ráðherra að eftirlit með matvælum hér á landi sé nægilegt?