Guðmundur Árni Stefánsson (andsvar):
Herra forseti. Nú þarf ekki vitnanna við. Maður reynir hér að fara málefnalega yfir málið. Ég tók það sérstaklega fram og frábað mér að menn dyttu niður í þessa leðju, þ.e. að halda því fram að þeir sem fylgdu ekki dómsmrh. að málum í þessu væru deigir í baráttunni gegn fíkniefnum, en hún væri hinn harði andstæðingur. Þetta er ódýrt. Þetta er lélegt. Þetta er slappt.
Herra forseti. Í ræðu hv. þm., hæstv. dómsmrh., 1998 segir hún, með leyfi forseta:
,,Slíkar rannsóknir og upplýsingar um sakamál og meðferð þeirra eru nauðsynlegar fyrir faglega umræðu um þessi málefni og mótun refsistefnu við lagasetningu og endurskoðun refsilaga.``
Hún hefur breytt um skoðun frá því þá. Ja, tilgangurinn helgar meðalið. Hún er að fara með fíkniefnabaráttuna inn í ódýran farveg og ég tek ekki þátt í því. Ég vil berjast gegn fíkniefnum eins og hún. En ekki með ódýrum yfirboðum.