Lúðvík Bergvinsson (um fundarstjórn):
Virðulegi forseti. Við höfum fundað nokkuð stíft alla þessa viku, m.a. fundað fimm kvöld í röð sem er næsta óþekkt. Og nú erum við hér að funda á laugardegi.
Það er ekkert óeðlilegt að menn spyrji hvað valdi því að Alþingi skuli vinna með þessum hætti. Hvað gerir það að verkum að hér á laugardegi skuli vera ætlunin eða hugmyndin að afgreiða 53 mál á einum og sama deginum, á einum og sama fundinum? Ég held, virðulegi forseti, að nú sé kannski lag til þess að við færum a.m.k. að láta svo líta út að eitthvert skipulag sé á þessari stofnun, að einhver vitiborin hugsun sé í þessari stofnun og við förum að hægja för, fresta þessum fundi í dag og koma hér aftur saman á mánudaginn. Hvaða skynsemi er í því að halda hér áfram og reyna að klára 53 mál?
Virðulegi forseti. Við verðum að halda reisn okkar gagnvart almenningi í landinu.
(Forseti (GuðjG): Forseti telur að Alþingi haldi bærilega reisn sinni þó að það fundi á laugardegi. Stór hluti þjóðarinnar vinnur gjarnan á laugardögum og þarf ekki að vorkenna okkur neitt yfir því.)