[prenta uppsett í dálka] 18. fundur, 126. lþ.
Guðmundur Árni Stefánsson:
Herra forseti. Á síðasta fundi Alþingis, fyrir örfáum mínútum, bar það til tíðinda að einn forustumanna þingsins, formaður þingflokks Sjálfstfl., kvartaði yfir því að stórpólitísk mál sem hafa verið í umræðu manna á meðal hér á landi á síðustu dögum og vikum væru tekin til umfjöllunar á hinu háa Alþingi. Hún ræddi þar sérstaklega um tvö mál. Annars vegar þá staðreynd að framhaldsskólum mun að óbreyttu lokað innan örfárra daga þar sem framhaldsskólakennarar hafa boðað til verkfalls. Á hinn bóginn tilgreindi hún umræðu sem hér fór fram og atkvæðagreiðslu um beiðni um skýrslu vegna ítrekaðra hækkana á iðgjöldum bifreiðatrygginga og tryggingafélaga almennt.
Ég vil beina þeirri fyrirspurn til hæstv. forseta hvort hann deili skoðunum hv. þm. Sigríðar Önnu Þórðardóttur í þessu samhengi. Ég er þessu algerlega andvígur og teldi Alþingi vera að bregðast skyldu sinni með því að taka þessi mál ekki á dagskrá.
