![](http://www.althingi.is/myndir/althlit.gif)
Þórunn Sveinbjarnardóttir:
Hæstv. forseti. Fulltrúar Samfylkingarinnar í hv. utanrmn., sú er hér stendur og hv. þm. Rannveig Guðmundsdóttir, rita undir nál. með fyrirvara.
Ég get tekið undir það með hv. þm. Steingrími J. Sigfússyni að í raun stöndum við frammi fyrir gerðum hlut þegar þessi samningur á í hlut en í sjálfu sér geri ég ekki athugasemdir við það að ákveðið sé að einkavæða þessa stofnun. Hins vegar er fyrirvari okkar Rannveigar Guðmundsdóttur, hv. þingkonu, gerður vegna þess að eignarhluti Íslendinga í hinu nýja fyrirtæki verður eftir í Landssímanum og eins og allir á hinu háa Alþingi vita hefur mikið einkavæðingarferli þar staðið yfir á Símanum og allsendis óljóst á þessari stundu hvernig það endar, þ.e. hvort Síminn verður seldur. En ég hygg að það gefi stjórnvöldum ráðrúm til að huga sérstaklega að eignarhlutanum í INTELSAT og hvort megi þá koma honum fyrir með öðrum hætti en innan Símans ellegar, verði það niðurstaðan eins og stefnir í hér, sé þess auðvitað tryggilega gætt að verð eignarhlutarins endurspeglist í verði Símans alls og að sjálfsögðu að Síminn, verði hann einkavæddur, uppfylli öll þau skilyrði sem þessi samningur leggur á herðar fyrirtækinu.