Ísólfur Gylfi Pálmason:
Herra forseti. Ég þakka hæstv. ráðherra fyrir þetta svar. Þetta mál hefur margoft verið til umræðu hér á Alþingi og í raun og veru óþarft að hafa mörg orð um aðstöðuna á þessum stað en ég gleðst mjög yfir að heyra að hæstv. ráðherra hafi ákveðið að strax eftir áramót fari fram útboð á því að byggja upp hjúkrunarheimili og viðbyggingu við sjúkrahúsið á Selfossi. Þetta skiptir afar miklu máli fyrir Suðurland og þetta skiptir auðvitað afar miklu máli fyrir öldrunarþjónustu á þessu svæði. Eins og fram hefur komið hjá hæstv. ráðherra er gert ráð fyrir því í fjárlögum að verja 60 millj. til þessa verkefnis á fjárlögum ársins 2003. Auk þess kemur nú fram að Framkvæmdasjóður aldraðra mun veita um 50 millj. í þetta verk. Hér er um brýnt verk að ræða og mjög kostnaðarsamt og það skiptir okkur líka miklu máli að því ljúki hratt og vel.