Kristinn H. Gunnarsson:
Herra forseti. Ég vil gera grein fyrir atkvæði mínu. Ég styð þetta frv. í heild sinni en tek það fram til áréttingar á skoðun minni sem ég kynnti í þinginu í gær að ég er andvígur einum lið í frv. sem er niðurfelling fjármagns til þátttöku í eignarhaldsfélögum á landsbyggðinni. Ég tel að sú breyting í frv. sé ekki í samræmi við afgreiðslu þingsins á tillögu ríkisstjórnarinnar um stefnu í byggðamálum. Í þingskjalinu segir svo, með leyfi forseta, í áliti meiri hluta iðnn.:
,,Nefndin telur jafnframt mikilvægt að styrkja varanlega rekstur atvinnuþróunarfélaganna ásamt eignarhaldsfélögum og atvinnuþróunarsjóðum.`` Það er því alveg ljóst, herra forseti, að vilji þingsins er sá að halda áfram að styðja við starfsemi eignarhaldsfélaga.