Ferill 737. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 1459 — 737. mál.
Svar
innanríkisráðherra við fyrirspurn frá Helga Hrafni Gunnarssyni
um lendingar flugvéla á Keflavíkurflugvelli og varaflugvöllum.
1. Hversu margar flugvélar lentu á Keflavíkurflugvelli á árunum 1995–2015, sundurliðað eftir árum?
Umbeðnar upplýsingar koma fram í eftirfarandi töflu:
Flugtök og lendingar á Keflavíkurflugvelli 1995–2015.
Borgaralegt millilandaflug |
Aðrar |
Samtals |
|||
Ár | Áætlunarflug | Leiguflug | Almannaflug | ||
1995 | 9.220 | 1.677 | 1.587 | 47.230 | 59.714 |
1996 | 10.410 | 1.471 | 1.792 | 48.205 | 61.878 |
1997 | 11.704 | 991 | 2.438 | 61.083 | 76.216 |
1998 | 13.822 | 1.574 | 2.082 | 74.871 | 92.349 |
1999 | 14.946 | 1.571 | 2.160 | 65.339 | 84.016 |
2000 | 15.871 | 1.740 | 2.295 | 54.653 | 74.559 |
2001 | 14.529 | 1.824 | 2.367 | 48.386 | 67.106 |
2002 | 12.730 | 1.546 | 1.928 | 46.554 | 62.758 |
2003 | 13.821 | 1.566 | 2.184 | 39.095 | 56.666 |
2004 | 16.190 | 1.532 | 2.617 | 39.876 | 60.215 |
2005 | 17.111 | 1.493 | 2.921 | 39.921 | 61.446 |
2006 | 18.963 | 1.696 | 3.895 | 36.522 | 61.076 |
2007 | 20.346 | 1.540 | 4.466 | 23.000 | 49.352 |
2008 | 18.643 | 1.579 | 3.925 | 18.869 | 43.016 |
2009 | 15.245 | 1.216 | 3.105 | 25.157 | 44.723 |
2010 | 16.406 | 1.380 | 3.030 | 31.601 | 52.417 |
2011 | 19.045 | 1.585 | 3.230 | 30.385 | 54.245 |
2012 | 20.930 | 1.327 | 3.418 | 32.198 | 57.873 |
2013 | 23.749 | 1.287 | 3.731 | 32.365 | 61.132 |
2014 | 28.147 | 1.168 | 3.537 | 38.078 | 70.930 |
2015 | 7.572 | 387 | 936 | 10.710 | 19.605 |
Tölur fyrir árið 2015 eiga við um fyrstu fjóra mánuði þess. Hugtakið hreyfing er notað fyrir bæði lendingar og flugtök. Þannig er lending ein hreyfing og flugtak önnur hreyfing. Því telst flugtak og lending vélar tvær hreyfingar. Taflan sýnir fjölda hreyfinga. Vegna orðalags í 2. tölul. fyrirspurnarinnar er taflan miðuð við alþjóðlegt borgaralegt flug og sýna fyrstu þrír dálkar töflunnar það. Fyrstu tvö dálkaheitin skýra sig að mestu sjálf en þriðja dálkaheitið, Almannaflug, spannar annað borgaralegt flug til landsins en farþega- eða vöruflug og er þar í flestum tilfellum um flug einkaflugvéla að ræða. Undir yfirskriftinni Aðrar hreyfingar eru taldar snertilendingar, þ.e. æfinga- og kennsluflug bæði borgaralegra flugvéla og herflugvéla. Að öðru leyti er allt innanlandsflug og allt ríkisflug, t.d. á vegum Landhelgisgæslunnar, sett í þennan dálk.
2. Hversu margar flugvélar sem áttu að lenda á Keflavíkurflugvelli neyddust árlega á sama tímabili til að lenda á eftirtöldum varaflugvöllum:
a. Reykjavíkurflugvelli,
b. Akureyrarflugvelli,
c. Egilsstaðaflugvelli?
Þessar upplýsingar eru ekki kerfisbundið skráðar og því er tölfræði um þær ekki tiltæk. Árlega berast til Keflavíkurflugvallar meira en 25 þúsund flugáætlanir, þ.e. tilkynningar um fyrirhugaða lendingu. Flugáætlanir berast í rafrænum skeytum og taka til atriða eins og flugleiðar, gerðar vélar, fjölda farþega, komutíma, varaflugvallar ef á þarf að halda og fleiri þátta. Til viðbótar berst síðan nokkur fjöldi afboðana en meginreglan er að í þeim kemur ekki annað fram en að fallið hafi verið frá fyrirhugaðri lendingu. Aðrar upplýsingar eins og ástæður og hvert flogið verði í staðinn eru alla jafna ekki gefnar. Vélar geta hætt við lendingu á tilteknum flugvelli á öllum stigum flugs frá brottfararflugvelli til lendingar á öðrum áfangastað.
Ákvörðun um breytingar á flugáætlunum og þar með lendingarstöðum er tekin af þeim sem rekur viðkomandi loftfar, flugstjóra eða báðum aðilum. Litlar líkur eru á að breytingar verði á þessu fyrirkomulagi þar sem það tíðkast nær undantekningarlaust í flugrekstri. Ástæður þess að ekki er lent á velli sem áður hafði verið gert ráð fyrir geta verið ýmsar, svo sem veður, en einnig viðskiptalegar ástæður.
Til að gefa hugmynd um í hve miklum mæli flugvélar þurfa frá að hverfa samkvæmt forsendum fyrirspurnarinnar var haft samband við flugfélagið Icelandair. Félagið hefur gefið upp tölur um vélar/flug sem þurft hafa að leita annað eftir að undirbúningur aðflugs var hafinn. Það er ágæt nálgun við að meta hve oft flugvélar sem miðað var við að mundu lenda á Keflavíkurflugvelli hafa þurft frá að hverfa vegna ófyrirsjáanlegra aðstæðna, oftast veðurs. Í eftirfarandi töflu fyrir árin 2005–2015 kemur fram hvar vélarnar hafa lent:
Tölur frá Icelandair um lendingar á varaflugvöllum 2005–2015.
Flugvöllur | 2005 | 2006 | 2007 | 2008 | 2009 | 2010 | 2011 | 2012 | 2013 | 2014 | 2015 |
Reykjavík | 0 | 0 | 1 | 2 | 1 | 3 | 1 | 0 | 0 | 0 | 2 |
Egilsstaðir | 2 | 0 | 2 | 6 | 0 | 1 | 1 | 1 | 0 | 0 | 1 |
Akureyri | 0 | 0 | 0 | 2 | 0 | 3 | 1 | 1 | 0 | 1 | 1 |
Alls | 2 | 0 | 3 | 10 | 1 | 7 | 3 | 2 | 0 | 1 | 4 |
Tölur fyrir árið 2015 eiga við um fyrstu fjóra mánuði þess. Rétt er að taka fram að árið 2010 olli eldgosið í Eyjafjallajökli erfiðleikum í flugi. Þá var veðurfar síðasta vetrar nokkuð óhagstætt fyrir flug. Sama má segja um árið 2008 en þá var veður nokkuð erfitt.