Ferill 79. máls. Aðrar útgáfur af skjalinu: PDF - Word Perfect.

---

148. löggjafarþing 2017–2018.
Þingskjal 123  —  79. mál.

Beiðni um skýrslu

frá félags- og jafnréttismálaráðherra um ábendingar í skýrslu rannsóknanefndar Alþingis um Íbúðalánasjóð sem varða stjórnsýsluna og viðbrögð við þeim.

Frá Birni Leví Gunnarssyni, Hönnu Katrínu Friðriksson, Halldóru Mogensen,
Helga Hrafni Gunnarssyni, Ingu Sæland, Jóni Steindóri Valdimarssyni,
Kolbeini Óttarssyni Proppé, Oddnýju G. Harðardóttur,
Smára McCarthy og Þórhildi Sunnu Ævarsdóttur.

    Með vísan til 54. gr. stjórnarskrárinnar og 54. gr. laga um þingsköp Alþingis er þess óskað að ráðherra flytji Alþingi skýrslu um ábendingar sem fram koma í rannsóknarskýrslu Alþingis um Íbúðalánasjóð sem varða stjórnsýsluna og viðbrögð við þeim.
    Í skýrslunni verði samantekt á ábendingum þeim til stjórnsýslunnar sem settar eru fram í skýrslunni og fjallað verði m.a. um:
     1.      hversu margar ábendingar koma fram sem beint er til stjórnsýslunnar,
     2.      hverjar þær ábendingar eru,
     3.      hvernig brugðist hefur verið við þeim, og
     4.      hvaða ábendingum hefur ekki enn verið brugðist við.
    Í þeim tilvikum sem brugðist hefur verið við ábendingum rannsóknarnefndarinnar er óskað eftir að upplýst verði:
     1.      hvernig tryggt hafi verið að þeim hafi verið og verði fylgt eftir,
     2.      hver hafi verið tilnefndur ábyrgðaraðili, og
     3.      hvernig ráðherra hyggist fylgja eftir ábendingum þar sem ekki hefur verið tilnefndur ábyrgðaraðili.
    Óskað er eftir tæmandi lista yfir þær ábendingar sem ráðherra hyggst ekki bregðast við ásamt ástæðum þess og mati ráðherra á þeim árangri sem eftirfylgni hefur haft í för með sér og hvernig sá árangur er mældur.
    Að lokum er farið fram á að ráðherra geri grein fyrir þeim breytingum sem hafa orðið á starfsemi Íbúðalánasjóðs í kjölfar ábendinga úr rannsóknarskýrslu Alþingis.

Greinargerð.

    Rannsóknarnefndir Alþingis hafa skilað gríðarlega ítarlegu starfi og hafa þær þrjár rannsóknir sem farið hafa fram skilað rúmlega 5.000 blaðsíðum í 20 bindum. Á þessum síðum er að finna fjölmargar ábendingar um betri stjórnarhætti, öflugri stjórnsýslu og skýrari verkferla. Til þess að þessi mikilvæga greiningarvinna nýtist, er nauðsynlegt að hafa yfirsýn yfir þessar ábendingar og tryggja að farið verði eftir þeim, svo sömu mistökin verði ekki gerð á ný.
    Vegna þess hversu yfirgripsmiklar skýrslurnar eru, er mjög erfitt að nálgast heildarsamantekt þeirra ábendinga sem þar eru settar fram og hvernig brugðist hefur verið við þeim. Mjög brýnt er því að þessi skýrsla verði lögð fram sem fyrst.