Ferill 261. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 279 — 261. mál.
Fyrirspurn
til umhverfis- og auðlindaráðherra um losun gróðurhúsalofttegunda.
Frá Ólafi Ísleifssyni.
1. Hver var árleg losun fólksbifreiða á gróðurhúsalofttegundum á árunum 2013–2017 borið saman við losun flutningabifreiða fyrir farm og farþega?
a. Hvað losar meðalþung flutningabifreið af gróðurhúsalofttegundum á við margar fólksbifreiðar?
b. Hvað losar meðalþung fólksflutningabifreið af gróðurhúsalofttegundum á við margar fólksbifreiðar?
c. Hve mikið losar flutningabifreið af þyngstu gerð með þyngstu tengivagna á við sparneytna fólksbifreið?
2. Telur ráðherra losun flugfara í háloftunum á gróðurhúsalofttegundum hættulegri lofthjúpnum en losun farartækja á jörðu niðri, skipa og verksmiðja? Hvaða rannsóknir sem birst hafa á ritrýndum vettvangi leggur ráðherra til grundvallar svari sínu?
3. Hversu mikil var losun á gróðurhúsalofttegundum á árunum 2013–2017 fyrir tilverknað flugfara í lofti, skipa á sjó, verksmiðja og iðnaðar og samgangna á landi?
4. Hver er munurinn á losun gróðurhúsalofttegunda af hálfu fiskiskipa og flutningaskipa með tilliti til magns og í ljósi þess hve mengandi losunin er?
5. Hversu mikla losun af hálfu skipa knúnum svartolíu telur ráðherra unnt að fyrirbyggja með breytingum á losunargjaldi á svartolíu þannig að ekki verði hagkvæmt að nota svartolíu? Hefur ráðherra beitt sér fyrir aðgerðum í þá átt? Ef ekki, hvers vegna?
6. Hve miklu munar árlega í losun gróðurhúsalofttegunda og sóts hjá meðaltogara sem annars vegar brennir hreinni skipagasolíu og hins vegar svartolíu?
Skriflegt svar óskast.