Ferill 650. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 1220 — 650. mál.
Svar
ferðamála-, iðnaðar- og nýsköpunarráðherra við fyrirspurn frá Ólafi Þór Gunnarssyni um gistinætur í hús- og ferðaþjónustubifreiðum.
1. Hefur ráðherra upplýsingar um fjölda gistinátta í bifreiðum á vegum bílaleiga, þ.m.t. húsbílum og svokölluðum „campers“?
Í þeim gistináttatölum sem Hagstofan safnar eru eingöngu teknar saman gistinætur sem greitt er gjald fyrir. Þetta er í samræmi við aðferðafræði sem skilgreind er í reglugerð Evrópuþingsins og ráðsins nr. 692/2011. Hins vegar er upplýsingar og gögn um dvalarflokkun ferðamanna sem gista í bifreiðum á vegum bílaleiga, þ.m.t. húsbílum og svokölluðum „campers“, að finna í könnun sem fór af stað árið 2017 og er framkvæmd mánaðarlega á vegum Ferðamálastofu og Hagstofu Íslands. Þar er bæði talað um flokkun á gistingu sem greinir á milli greiddrar gistingar (skráðar gistinætur) og ógreiddrar gistingar (óskráðar gistinætur).
Í bráðabirgðatölum Hagstofunnar um „Áætlaðar óskráðar erlendar gistinætur 2017–2019“ má finna áætlaðar tölur fyrir hvern mánuð af gistinóttum sem ekki er greitt fyrir. Skilgreiningin er eftirfarandi: „Bílar, ógreitt; Gisting í húsbíl, tjaldi, tjaldvagni eða hjólhýsi utan gjaldskyldra tjaldsvæða.“
Hér er efni sem sést aðeins í pdf-skjalinu.
Ef greitt er fyrir framantaldar tegundir gistimáta á tjaldsvæði eru þær taldar með á tjaldsvæðum í gistináttatalningu Hagstofunnar.
2. Hefur ráðherra upplýsingar um í hvaða mæli gistináttagjald vegna slíkra bifreiða skilar sér í ríkissjóð af tjaldsvæðum og frá ferðaþjónustuaðilum?
Gistináttagjald vegna húsbíla eða svokallaðra „campers“ er ekki innheimt nema viðkomandi dvelji á tjaldsvæði og greiði þar fyrir gistingu. Þær gistináttatölur eru í gagnagrunni Hagstofunnar í gistiflokknum tjaldsvæði. Tölur fyrir tjaldsvæði árið 2018 í gagnagrunni Hagstofunnar hafa enn ekki verið birtar.
Á tjaldsvæðum er ekki aðgreint á milli húsbíla, „campera“, tjaldvagna, hjólhýsa eða tjalda á tjaldsvæðum. Árið 2017 voru gistinætur á tjaldsvæðum samtals 1.070.969. Miðað við 300 kr. á gistieiningu á tjaldsvæðum ættu tekjur af gistináttagjaldi vegna þeirra að hafa verið 321.300.000 kr.
Út frá töflu sem má nálgast á Mælaborði ferðaþjónustunnar kemur fram að hlutfallið fyrir ógreidda gistingu í húsbíl eða tjaldi er 1,71% af heildinni fyrir árið 2018 en það er eina árið til þessa sem tölur eru tiltækar fyrir.
Í eftirfarandi töflu má sjá dreifingu gistingar fyrir árið 2018.
Greidd/ógreidd gisting, Dvalarflokkun | Hlutfall% | Miðgildi dvalarlengdar | Meðaldvalarlengd ferðamanna |
Ekki greitt fyrir næturdvöl, Vinir/ættingjar, íbúðaskipti o.fl. | 3,83% | 6 | 8,4 |
Ekki greitt fyrir næturdvöl, Tjald/húsbíll (ekki greitt fyrir) | 1,71% | 5 | 5,5 |
Ekki greitt fyrir næturdvöl, Önnur gisting | 2,68% | 3 | 5,5 |
Ekki greitt fyrir næturdvöl, Gisti ekki | 1,68% | 0 | 0,0 |
Greitt fyrir næturdvöl, Hótel, gistiheimili | 46,25% | 4 | 4,5 |
Greitt fyrir næturdvöl, Íbúðagisting | 15,78% | 4 | 5,0 |
Greitt fyrir næturdvöl, Hostel | 9,97% | 3 | 3,7 |
Greitt fyrir næturdvöl, Tjald (greitt fyrir) | 2,56% | 6 | 6,9 |
Greitt fyrir næturdvöl, Hótelíbúð | 7,05% | 3 | 3,8 |
Greitt fyrir næturdvöl, Sumarhús eða skálar | 5,18% | 3 | 3,9 |
Greitt fyrir næturdvöl, Húsbíll (greitt fyrir) | 3,11% | 7 | 6,9 |
Greitt fyrir næturdvöl, Önnur gisting | 0,20% | 2 | 4,0 |
www.maelabordferdathjonustunnar.is/is/kannanir/landamaerakonnun
3. Telur ráðherra koma til greina að innheimta gistináttagjald vegna slíkrar gistingar af bílaleigum fremur en gististöðum og stuðla þannig að því að leigutakar velji að gista á skipulögðum ferðamannastöðum þó að í bílum sínum sé?
Á vettvangi Stjórnstöðvar ferðamála er nú að störfum starfshópur sem hefur það verkefni að kanna leiðir til gjaldtöku í ferðaþjónustu samkvæmt stjórnarsáttmála. Meðal verkefna hópsins er að tilgreina helstu leiðir til gjaldtöku og fjalla um kosti þeirra og galla út frá a) mismunandi tilgangi gjaldtöku; b) völdum markmiðum Vegvísis í ferðaþjónustu (þ.m.t. dreifingu ferðamanna um landið); c) lagalegum álitaefnum. Þá er hópnum ætlað að gera rökstudda tillögu til gjaldtöku á grundvelli þess sem segir í tillögunni.
Hópurinn hefur ekki lokið störfum en eitt af því sem hann hefur að leiðarljósi í störfum sínum er að stuðla að sanngjörnu samkeppnisumhverfi í ferðaþjónustu og auknu jafnræði í innheimtu gistináttagjalds. Sú leið sem spurt er um gæti þegar af þeim sökum hlotið brautargengi í tillögum hópsins sem síðan verða teknar til skoðunar á vettvangi þeirra ráðherra sem hlut eiga að máli.