Ferill 463. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 675 — 463. mál.
Fyrirspurn
til heilbrigðisráðherra um stefnu í þjónustu við aldraða.
Frá Guðjóni S. Brjánssyni og Ólafi Þór Gunnarssyni.
1. Telur ráðherra að tímabært sé að skoða búsetu á hjúkrunarheimili með öðrum hætti en nú er, t.d. með aukinni áherslu á heimilisbrag og sveigjanlegri félagslega aðstoð fremur en heilbrigðisþjónustu?
2. Telur ráðherra að fjárhagsleg umgjörð í starfsemi hjúkrunarheimila sé í nútímalegu og eðlilegu horfi, t.d. hvað varðar greiðsluhlut skjólstæðinganna sjálfra?
3. Telur ráðherra að tímabært sé að huga að grundvallaráherslubreytingum í þjónustu við aldraða þar sem markvisst verði horfið frá stofnanauppbyggingu en þess í stað gerð langtímaáætlun um húsnæðisátak í þágu aldraðra samhliða raunverulegu átaki í heimaþjónustu, bæði á félags- og heilbrigðissviði?
4. Telur ráðherra grundvöll til þess að í samvinnu við Íbúðalánasjóð verði unnið að sérstöku átaki í þessu efni?
5. Mun ráðherra beita sér fyrir auknum framlögum til málaflokksins á næstu árum?