Ferill 503. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 886 — 503. mál.
Svar
samgöngu- og sveitarstjórnarráðherra við fyrirspurn frá Þorsteini Víglundssyni um nefndir og starfs- og stýrihópa.
Fyrirspurnin hljóðar svo:
Hvaða nefndir og starfs- og stýrihópar á málefnasviði ráðherra hafa verið sett á fót á yfirstandandi kjörtímabili og hver eru hlutverk þeirra?
Í meðfylgjandi töflu eru upplýsingar um tímabundnar nefndir, starfs- og stýrihópa sem sett hafa verið á fót á yfirstandandi kjörtímabili og hlutverk þeirra. Um er að ræða sautján nefndir, starfs- og stýrihópa. Hér er ekki greint frá lögbundnum nefndum og starfshópum sem ráðherra hefur endurskipað á kjörtímabilinu, en undir málefnasvið ráðuneytisins teljast nítján lögbundnar nefndir og ráð, tvær lögbundnar úrskurðarnefndir og fimm lögbundnar stjórnir.
Nefnd | Hlutverk |
Starfshópur um endurskoðun fjármálakafla sveitarstjórnarlaga | Að koma fram með drög að breytingum á ákvæðum fjármálakafla sveitarstjórnarlaga sem snúa að fjárhagslegum viðmiðum |
Starfshópur um þjónustukort | Að styðja við framgang verkefnisins sem felur í sér gerð þjónustukorts sem sýnir aðgengi landsmanna að allri almennri þjónustu hins opinbera og einkaaðila |
Starfshópur um gjald á framleiðslu og dreifingu raforku | Að vinna með álitsgerð starfshóps frá árinu 2017 og komast að sameiginlegri niðurstöðu um leiðir til skattlagningar á mannvirkjum sem framleiða og flytja raforku og eru ekki skattskyldar í gildandi lögum |
Teymi um framtíð minkaræktar í samvinnu við ANR | Að vinna að því með hagsmunaaðilum að greina framtíðarhorfur minkaræktar |
Valnefnd um samkeppnisframlög úr byggðaáætlun | Að gera tillögu til ráðherra um veitingu samkeppnisframlaga sem veitt eru á grundvelli stefnumótandi byggðaáætlunar fyrir árin 2018–2024 |
Nefnd um stöðu og hlutverk landshlutasamtaka sveitarfélaga | Að meta stöðu landshlutasamtaka sveitarfélaga með það að markmiði að skýra hlutverk þeirra og stöðu gagnvart annars vegar sveitarfélögum og hins vegar ríkinu |
Flugstefna Íslands: Verkefnisstjórn | Að semja tillögu að stefnu í flugi sem miðar að því að skapa umhverfi sem viðheldur grunni fyrir flugrekstur og flugtengda starfsemi á Íslandi og styður vöxt hennar að því marki sem það er þjóðhagslega hagkvæmt og eykur atvinnusköpun |
Starfshópur um opinbert umhverfi til flugrekstrar og flugleiðsöguþjónustu | Tillögur í flugstefnu um opinbert umhverfi til flugrekstrar og flugleiðsöguþjónustu |
Starfshópur um alþjóða- og áætlunarflugvelli | Tillögur í flugstefnu um alþjóða- og áætlunarflugvelli |
Starfshópur um almannaflug, menntun og þjálfun | Tillögur í flugstefnu um almannaflug, menntun og þjálfun |
Nefnd um úrræði vegna ökumanna sem keyra undir áhrifum lyfja og/eða fíkniefna | Að vinna tillögur til sóknar gegn þeirri vá í umferðinni sem eru ökumenn sem keyra undir áhrifum |
Verkefnahópur til að leiða viðræður um samgöngur á höfuðborgarsvæðinu | Að leiða viðræður um samgöngur á höfuðborgarsvæðinu |
Starfshópur um uppbyggingu samgangna á höfuðborgarsvæðinu til 2033 | Að móta tillögur til ríkisstjórnarinnar og sveitarfélaga á svæðinu um næstu skref í uppbyggingu samgangna á höfuðborgarsvæðinu og fjármögnun þeirra |
Starfshópur um endurskoðun reglugerðar um umferðarmerki | Að meta hvort tilefni séu til að setja nýja heildarreglugerð um umferðarmerki eða hvort gera skuli breytingar á gildandi reglugerð |
Starfshópur um afhendingu og móttöku nýrrar Vestmannaeyjaferju | Að eiga samráð um móttöku nýrrar Vestmannaeyjaferju og þau álitamál sem upp kunna að koma og að aðstoða við að leiða til lykta hnökralausa yfirfærslu rekstrar ferjunnar til Vestmannaeyjabæjar |
Starfshópur um fjármögnun samgöngukerfisins | Að stilla upp útfærslum/sviðsmyndum af mögulegum fjármögnunarleiðum til þess að standa straum af kostnaði við fjárfestingar í samgöngukerfinu |
Aðgerðahópur um uppbyggingu Akureyrarflugvallar | Að gera tillögu um endurbætur á flugstöðinni til næstu framtíðar í samræmi við hugmyndir Isavia um stækkun og endurbætur á núverandi aðstöðu í samræmi við þarfir |