Ferill 188. máls. Aðrar útgáfur af skjalinu: PDF - Word Perfect.
152. löggjafarþing 2021–2022.
Þingskjal 225 — 188. mál.
2. umræða.
Nefndarálit
um frumvarp til laga um breytingu á lögum um Barna- og fjölskyldustofu og lögum um Gæða- og eftirlitsstofnun velferðarmála (flutningur starfsmanna).
Frá velferðarnefnd.
Nefndin hefur fjallað um málið og fengið á sinn fund Önnu Tryggvadóttur, Ernu Kristínu Blöndal og Gissur Pétursson frá félagsmálaráðuneyti. Nefndinni barst umsögn frá BHM og minnisblað frá félagsmálaráðuneytinu.
Við gildistöku laga um Barna- og fjölskyldustofu, nr. 87/2021, og laga um Gæða- og eftirlitsstofnun velferðarmála, nr. 88/2021, hinn 1. janúar 2022 verða lagðar niður tvær stofnanir, annars vegar Barnaverndarstofa og hins vegar ráðuneytisstofnunin Gæða- og eftirlitsstofnun félagsþjónustu og barnaverndar. Við gildistökuna munu fyrrgreindar stofnanir taka yfir verkefni síðarnefndu stofnananna. Frumvarp þetta kveður á um að störf hjá Barnaverndarstofu og Gæða- og eftirlitsstofnun félagsþjónustu og barnaverndar verði flutt til hinna nýju stofnana með því að þær yfirtaki gildandi ráðningarsamninga við þá starfsmenn sem eru í starfi við gildistöku laga nr. 87/2021 og laga nr. 88/2021.
BHM lýsir í sinni umsögn áhyggjum af því að breytingar á verkefnum leiði til þess að starfi verði breytt það mikið að það verði mögulega lagt niður eða starfsmönnum sagt upp. Í minnisblaði sem nefndinni barst frá félagsmálaráðuneytinu kemur fram að af hálfu ráðuneytisins er lögð rík áhersla á að engum starfsmanni Barnaverndarstofu og Gæða- og eftirlitsstofnun félagsþjónustu og barnaverndar verði sagt upp um áramótin á þeim grundvelli að starf hans hafi verið lagt niður. Þá áréttar nefndin að í frumvarpinu kemur fram að ráðningarkjör starfsmanna verða þau sömu hjá nýjum stofnunum og ráðningarkjör þeirra hjá Barnaverndarstofu og Gæða- og eftirlitsstofnun félagsþjónustu og barnaverndar. Tekur nefndin undir mikilvægi þess að réttarstaða starfsmanna verði tryggð á fyrrgreindan hátt og leggur til að frumvarpið verði samþykkt óbreytt.
Alþingi, 21. desember 2021.
Líneik Anna Sævarsdóttir, form., frsm. |
Ásmundur Friðriksson. | Diljá Mist Einarsdóttir. |
Guðmundur Ingi Kristinsson. | Guðrún Hafsteinsdóttir. | Hafdís Hrönn Hafsteinsdóttir. |
Halldóra Mogensen. | Jódís Skúladóttir. | Viktor Stefán Pálsson. |