Ferill 523. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1189 — 523. mál.
Svar
innviðaráðherra við fyrirspurn frá Ásthildi Lóu Þórsdóttur um íbúðarhúsnæði í eigu einstaklinga.
1. Hversu margir einstaklingar töldu fram íbúðarhúsnæði á skattframtali vegna ársins 2008 og hversu margar voru þær fasteignir?
Samkvæmt upplýsingum frá Skattinum töldu 161.204 einstaklingar fram 204.929 innlendar fasteignir í kafla 4.1 á skattframtali einstaklinga, RSK 1.01, árið 2008.
Rétt þykir að benda á að hjón og samskattað sambúðarfólk telur fram eignir saman og skilar einni eignasíðu með skattframtali. Hér er gengið út frá því að samskattaðir einstaklingar eigi fasteignirnar sem taldar eru fram að jöfnu. Það kann hins vegar að vera að fasteign sé séreign annars sambúðaraðilans. Þá er hér ekki einungis um að ræða íbúðarhúsnæði í fullri eigu framteljanda heldur eru hlutir í fasteign, sumarbústaðir, lóðir og jarðspildur, útihús og annað slíkt einnig talið fram í þessum kafla skattframtalsins.
Við samsköttun gildir sú almenna regla að eignir fylgja kennitölu þess maka sem er eldri en í einstökum undantekningartilfellum kunna eignirnar að fylgja yngri makanum. Þessir einstaklingar eru ekki taldir með í töflunni sem birt er sem svar við 2. tölul. fyrirspurnarinnar.
2. Hversu margir einstaklingar sem töldu fram íbúðarhúsnæði á skattframtali vegna ársins 2008 töldu einnig fram íbúðarhúsnæði á skattframtali vegna eftirtalinna ára og hversu margar voru þær fasteignir:
a. 2009,
b. 2010,
c. 2011,
d. 2012,
e. 2013,
f. 2014,
g. 2015,
h. 2016,
i. 2017,
j. 2018,
k. 2019,
l. 2020,
m. 2021?
Eftirfarandi tafla sýnir að af þeim 161.204 framteljendum sem áttu fasteign árið 2008 voru 137.451 enn skattskyldir í álagningu árið 2022, þar af áttu 123.309 fasteign í árslok 2021, ýmist einir sér eða með maka. Þannig má ætla að 14.142 þeirra einstaklinga sem áttu fasteign árið 2008 og voru enn skattskyldir í álagningu árið 2022 hafa ekki átt fasteign þegar lagt var á það árið. Upplýsingarnar byggjast á skattframtölum einstaklinga og miðast þær við stöðu framtalsgagna þann 23. desember 2022. Rétt er að benda á að nokkur hópur framteljenda fellur út við álagningu á hverju ári.
| Einstaklingar sem áttu fasteignir 2008–2021. | |||
| Tekjuár | Þar af þeir sem áttu eignir | Þar af skattskyldir við álagningu | Fjöldi eigna |
| 2008 | 161.204 | 161.204 | 204.929 |
| 2009 | 157.260 | 160.068 | 173.364 |
| 2010 | 152.761 | 158.416 | 170.952 |
| 2011 | 148.749 | 156.554 | 168.289 |
| 2012 | 144.995 | 154.715 | 165.816 |
| 2013 | 141.263 | 153.009 | 157.826 |
| 2014 | 138.139 | 151.047 | 155.289 |
| 2015 | 135.148 | 149.038 | 153.540 |
| 2016 | 132.430 | 146.859 | 150.877 |
| 2017 | 130.120 | 144.620 | 148.409 |
| 2018 | 128.465 | 142.747 | 147.184 |
| 2019 | 126.827 | 140.886 | 145.700 |
| 2020 | 125.119 | 139.174 | 144.857 |
| 2021 | 123.309 | 137.451 | 144.511 |
