Ferill 493. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1811 — 493. mál.
Svar
félags- og vinnumarkaðsráðherra við fyrirspurn frá Jóhanni Páli Jóhannssyni um breytingar á fjárhæðum örorkulífeyris, tekjutryggingar og heimilisuppbótar.
1. Hversu mikið þyrftu fjárhæðir örorkulífeyris, tekjutryggingar og heimilisuppbótar að hækka um næstu áramót, í jöfnum hlutföllum þannig að ekki komi til „krónufalls“-áhrifa, til að samtala þeirra yrði jöfn framfærsluviðmiði næsta árs og enginn þyrfti að fá greidda sérstaka uppbót á lífeyri vegna framfærslu, sbr. 2. mgr. 9. gr. laga um félagslega aðstoð?
Samkvæmt útreikningum Tryggingastofnunar ríkisins þyrftu fjárhæðir lífeyris, tekjutryggingar og heimilisuppbótar að hækka um 26,55% til að ná grunnupphæð sérstakrar framfærsluuppbótar fyrir einstaklinga sem ekki fá greidda heimilisuppbót. Þessi útreikningur miðast við upphæðir almannatrygginga og félagslegrar aðstoðar fyrir árið 2023.
2. Hver yrði beinn kostnaður ríkissjóðs af slíkri breytingu á ársgrundvelli?
Beinn kostnaður yrði um 12 ma. kr. miðað við að aldurstengd örorkuuppbót hækki í samræmi við hækkun örorkulífeyris.
3. Hvaða áhrif má ætla að breytingarnar hafi á tekjur ríkissjóðs af tekjuskatti einstaklinga?
Búast má við að um fimmtungur útgjaldaaukningar skili sér í formi tekjuskatts til ríkissjóðs. Útsvar til sveitarfélaga er ekki reiknað með.
4. Yrðu einhverjir öryrkjar eða endurhæfingarlífeyrisþegar fyrir kjararýrnun ef fyrrnefndir bótaflokkar yrðu hækkaðir með þessum hætti en reglur um framfærsluuppbótina og skerðingu hennar felldar brott?
Já, búast má við að um 10% örorku- og endurhæfingarlífeyrisþega mundu verða fyrir kjararýrnun. Um er að ræða annars vegar einstaklinga sem eru með lágt búsetuhlutfall hér á landi og hins vegar einstaklinga sem eru með lágt aldurstengt lífeyrishlutfall.
