Ferill 552. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 651 — 552. mál.
Tillaga til þingsályktunar
um lækkun lóðarleigu ríkisins í þéttbýli Reykjanesbæjar.
Flm.: Guðbrandur Einarsson, Ásmundur Friðriksson, Ásthildur Lóa Þórsdóttir, Oddný G. Harðardóttir.
Alþingi ályktar að fela fjármála- og efnahagsráðherra að veita 25% afslátt af lóðarleigu ríkisins í þéttbýli Reykjanesbæjar í samræmi við gjaldskrá sveitarfélagsins.
Greinargerð.
Byggðastofnun gefur út skýrslu á hverju ári um fasteignagjöld. Þar kemur m.a. fram að meðaltal lóðarleigu á Íslandi, af viðmiðunarstærðinni 808 m2, sé 49.435 kr. Í þessum samanburði er Reykjanesbær langt frá meðaltalinu, þar sem lóðarleiga reiknast hæst á landinu í Keflavík, 149.655 kr., og í Njarðvík, 139.275 kr. Þau sem greiða lóðarleigu til sveitarfélagsins og njóta 25% afsláttar greiða hins vegar 112.241 kr. í Keflavík og 104.456 kr. í Njarðvík.
Í svari fjármála- og efnahagsráðherra um lóðarleigu á lóðum í eigu ríkisins, frá 5. september 2023 (þskj. 2264, 678. mál), segir að lóðarleiga ríkisins í þéttbýli Reykjanesbæjar sé almennt 2% af lóðarmati í samræmi við gjaldskrá sveitarfélagsins. Í ljósi þess afsláttar sem aðrir íbúar Reykjanesbæjar njóta er ekki hægt að fallast á að ríkið innheimti lóðarleigu í samræmi við gjaldskrá sveitarfélagsins. Flutningsmenn telja mikilvægt að leiðrétta þá mismunun sem fólgin er í gjaldtökunni nú og gerir það að verkum að kostnaður íbúa á Ásbrú er hærri en annars staðar á landinu.
Flutningsmenn leggja því til að fjármála- og efnahagsráðherra verði falið að veita íbúum á lóðum í eigu ríkisins í þéttbýli Reykjanesbæjar sama 25% afslátt af lóðarleigu og þeir íbúar sem leigja af sveitarfélaginu njóta.