Skipun ráðuneytisstjóra í félagsmálaráðuneyti.
Virðulegi forseti. Ég tek undir það að niðurstaða umboðsmanns Alþingis er það sem mestu máli skiptir og það sem ráðuneytinu ber að líta til. Þar segir m.a.:
„Eins og athugun mín hefur verið afmörkuð felur niðurstaða mín hér að framan ekki í sér endanlega afstöðu um hver hafi verið hæfastur umsækjenda af þeim sem sóttu um starf ráðuneytisstjóra félagsmálaráðuneytisins.“
Ég undirstrika og endurtek að þrátt fyrir að umboðsmaður Alþingis eyði tugum blaðsíðna í að bera saman tvo tiltekna umsækjendur á grundvelli margvíslegra gagna telur hann sig ekki taka afstöðu til þess hvor hafi verið hæfastur. (Gripið fram í.) Svo segir jafnframt í lokakafla í niðurstöðum umboðsmanns Alþingis:
„Að þessu virtu og að teknu tilliti til hagsmuna þess sem hlaut umrætt starf tel ég ólíklegt að ofangreindir annmarkar leiði til ógildingar á skipuninni.“
Þetta er (Gripið fram í.) líka að mínu mati mjög mikilvægt atriði sem ég vil halda til haga hér. Umboðsmaður telur ekki að athugun hans hafi leitt í ljós að álitið haggi þeirri skipun sem átti sér stað fyrir tæpum tveimur árum. Það er mikilvægt atriði í mínum huga.
Þá segir umboðsmaðurinn að það séu að síðustu tilmæli hans til félagsmálaráðuneytisins að það taki framvegis mið af þeim sjónarmiðum sem fram komi í álitinu. Það mun ég sem nýr félagsmálaráðherra gera, að sjálfsögðu, og það hef ég tekið fram í viðtölum við fjölmiðla um þetta mál. (Gripið fram í.)
Ég ber mikla virðingu fyrir embætti umboðsmanns Alþingis. Ég var í forsætisnefnd þingsins þegar hann var ráðinn (Gripið fram í.) og ég tók þátt í því að móta starfsreglur hans. Ég ber mikla virðingu fyrir embættinu og ég mun að sjálfsögðu draga lærdóm af þeim ábendingum sem fram koma í þessu áliti en ég tel þær ekki þess eðlis að þær breyti ráðningu þess starfsmanns sem hefur verið ráðinn. Hún er mjög hæf í sínu starfi ásamt þeim (Forseti hringir.) auðvitað sem sótti á móti henni sem er mjög hæf manneskja líka. Ég vil taka það fram.