Árneshreppur.
Virðulegur forseti. Það er vissulega rétt sem fram hefur komið í fyrirspurn og svari við henni að þó nokkuð hefur áunnist með samþykkt þingsályktunar í marsmánuði 2003 og menn hafa einbeitt sér að samgöngumálum og uppbyggingu á ferðaþjónustu. Það hefur verið vel gert sem komið er í þeim efnum á þessum tíma. Ég vil þó segja að ég tel að það þurfi töluvert meira átak til að koma málum í góða höfn, sérstaklega samgönguþættinum, því þótt það fjármagn sem varið hefur verið til endurbóta á veginum og mun verða á næstu árum sé umtalsvert þá er það ekki nema brot af því sem þarf eða hluti af því sem þarf til að koma sæmilega góðum vegi norður í Árneshrepp og ég hvet hæstv. ríkisstjórn til að taka betur á í þeim efnum.