Ísland á innri markaði Evrópu.
Virðulegi forseti. Hv. þingmaður virðist nú deila þeim misskilningi með nokkrum öðrum að Danir séu með sjálfstæðan gjaldmiðil. Mjög gott dæmi um að aðild að evrunni þurfi ekki að kalla á atvinnuleysi er einmitt ástandið í Danmörku. Danir búa við evru í reynd. Það eru mörg önnur lönd í Evrópu sem geta sýnt mjög góða niðurstöðu í atvinnumálum. Því fer því fjarri að hægt sé að setja samasemmerki á milli atvinnuleysis annars vegar og upptöku evru hins vegar.
Það sem hv. þingmaður skuldar þjóðinni er skýring á því hvar hinn sérstaki ávinningur liggur og hvað það er sem gerir það réttlætanlegt að leggja slíkar álögur á íslensk heimili og íslensk smáfyrirtæki og hlaða þannig undir stórkapítalið sem hv. þingmaður þykist alltaf á móti, a.m.k. til hátíðabrigða.