tillögur starfshóps um heilbrigðismál.
Frú forseti. Það er rétt að það er þingið sem hefur fjárveitingavaldið og það er þingið sem ákveður þess vegna hvaða fjármunum er ráðstafað m.a. til kragasjúkrahúsanna og Landspítala – háskólasjúkrahúss. Við munum ræða síðar í dag tillögur fjárlaganefndar til breytinga á því frumvarpi sem fyrir liggur og það mun væntanlega koma þar fram, sem kemur ekki á óvart, að það eru óverulegar breytingar á milli umræðna.
Hv. þingmaður talar um flatan niðurskurð á þessu ári og á því næsta. Ég vil vekja athygli á því að miðað er við 5% niðurskurð í eiginlegri heilbrigðisþjónustu á næsta ári … (GÞÞ: Flatur.) — Nei, alls ekki flatur, en 10% í stjórnsýslunni og til merkis um að hér er ekki um flatan niðurskurð að ræða vil ég benda á að það er 2,8% niðurskurður í heilsugæslunni, sem þýðir auðvitað (GÞÞ: Flatur.) að það er meiri niðurskurður á öðrum sviðum heilbrigðisþjónustunnar. (GÞÞ: Flatur.) Flatur, tönnlast hv. þingmaður á. (Forseti hringir.) Ramminn er að sjálfsögðu flatur, 2,8% yfir öll heilsugæslusvið á landinu en, hv. þingmaður, (Forseti hringir.) þetta er meðaltal og niðurstaða sem er ekki hægt (Forseti hringir.) að túlka sem flatan niðurskurð. Það eru öfugmæli.