aðgerðir til að stuðla að sátt við heimilin.
Virðulegi forseti. Því miður er það þannig að við horfum ekki nógu mikið til fortíðar. Ef við mundum gera það og skoða það sem gerðist í kreppunni miklu, ekki bara í Bandaríkjunum heldur hér á landi, mundum við átta okkur á því að efnahagsáætlun AGS er að gera vandann miklu verri. Við erum að skera niður á sama tíma og samdrátturinn er með því mesta sem við höfum séð lengi og niðurskurður á útgjöldum mun þýða að við þurfum að segja upp fólki og að skattstofnar muni dragast saman og tekjur ríkissjóðs. Á þarnæsta ári, sem sagt á árinu 2012, eftir niðurskurðinn á árinu 2011, þurfum við að skera niður af því að við skárum niður 2011. Þessu áttuðu Bandaríkjamenn sig á í kreppunni miklu eftir að hafa reynt þennan vítahring í nokkur ár og gert það sem varð mikill samdráttur af kreppu.
Hv. þingmaður. Ég óttast að við séum að fara sömu leið vegna þess að við viljum bara einblína á núið, ég skal viðurkenna að við mættum horfa meira á framtíðina en við erum fyrst og fremst að horfa á núið, á exel-skjölin sem eiga að stemma debet og kredit en ekki að velta fyrir okkur hvaða áhrif þessi afstemming hefur á fjárlög næstu ára.
Hvað varðar að örva eftirspurnina tel ég að hún verði mun meiri ef við hækkum lægstu laun og lægstu bætur frekar en að lækka skattbyrðina á þeim sem eru með hæstu launin eins og Sjálfstæðisflokkurinn virðist að minnsta kosti vilja gera.