vextir og verðtrygging o.fl.
Frú forseti. Ég ætla mér ekki þá dul að svara fyrir hvert einstakt atriði í greinargerð með þessu frumvarpi. Það hlýtur hæstv. efnahags- og viðskiptaráðherra að gera.
Það sem ég mælti fyrir er nefndarálit meiri hluta efnahags- og skattanefndar. Eins og ég sagði áðan leggur nefndin til að sérákvæði sem er að finna í 1. gr. varðandi fyrirtæki verði fellt úr frumvarpinu með vísan til þess sem ég sagði og er að finna í álitum Seðlabanka Íslands og Fjármálaeftirlitsins og til þeirra aðgerða sem nú er verið að grípa til til þess að leysa úr skuldavanda fyrirtækja í landinu. Það á líka við um þau fyrirtæki sem hv. þingmaður nefndi.