ráðstafanir í ríkisfjármálum.
Virðulegi forseti. Við höfum tekist ansi oft á um eignarréttinn. Því er þannig farið að hægt er að veita fólki eignarrétt á ákveðinni eign, sem var eign annarra áður. Síðan vilja menn leiðrétta það sem við köllum eignatilfærslu frá einum hópi til annars hóps.
Við ræddum í hv. efnahags- og viðskiptanefnd í morgun auðlegðarskattinn þar sem fram kom að hann gæti stangast á við eignarrétt þeirra sem greiða auðlegðarskattinn. En eignirnar sem verið er að greiða eignarskatt af voru að hluta til tryggðar að verðgildi af skattgreiðendum. Þær byggja ekki á launum sem eigendur þessara eigna fengu og keyptu eignirnar með, heldur eru þetta eignir, innstæður meðal annars, sem skattgreiðendur tryggðu að fullu eftir hrun. Þetta eru eignir sem fólk átti í peningamarkaðssjóðum og skattgreiðendur tryggðu að mestu leyti verðgildi þeirra eigna í sjóðunum.
Talandi um að það sé einhver tvísköttun í gegnum það að tekjurnar sem voru notaðar til kaupa eignirnar hafi verið skattlagðar er ekki rétt, vegna þess að hluti af þessum eignum var færður í hendur fólks í gegnum skattgreiðendur, í gegnum eignatilfærslu.
Ég viðurkenni það að þegar búið er að færa eign til fjármagnseigenda (Forseti hringir.) eiga þeir hana en það var óréttlætið sem fólst í því að færa eignina til fjármagnseigenda sem þarf að leiðrétta.