framtíð Fisktækniskóla Íslands.

Hæstv. forseti. Ég þakka þessa umræðu og svör hæstv. menntamálaráðherra. Ég er alveg sammála, ég hefði viljað hafa þau afdráttarlausari þannig að skólinn fengi örugglega framgang og yrði á fjárlögum á næsta ári. Það er gríðarlega mikilvægt. Skólinn hefur sannað gildi sitt, sérstaklega í vetur. Hann nefndi að það hefur gengið illa að fá nemendur inn í skólann en það var vegna þess að starfsleyfin komu svo seint að búið var að missa nemendur þess árs sem voru að sækja um í skólanum, það var búið að missa þá í aðra skóla. Það var ástæðan fyrir því að þetta gekk svona brösuglega og hefur gengið mjög illa. Það er í rauninni allt vegna þeirrar miklu óvissu sem hefur ríkt um skólann. Það er sú óvissa sem er alls staðar í þjóðfélaginu, ég er ekkert að segja það, sem þarf að eyða. Eins og hefur komið fram í máli hv. þingmanna úr Grindavík og hjá hv. þm. Össuri … (Gripið fram í.) já, er þetta gríðarlega mikilvægur skóli, ekki síst í ljósi þess að þetta er ein mikilvægasta atvinnugrein okkar Íslendinga og líka í ljósi þess að við erum með tvo landbúnaðarháskóla. Það er í rauninni alveg ótrúlegt að þessum skóla hafi ekki verið komið á laggirnar fyrir löngu því að það hefur átt sér stað mikil nýsköpun og þróun í sjávarútvegi á undanförnum árum. Ég get nefnt Codland og Sjávarklasann og sem til dæmis leggja mikla áherslu á að þessi skóli vinni saman með þessu verkefni sem er ótrúlega spennandi og í því er fólgið að auka virði fiskafla á Íslandi.

Við stöndum framar öðrum þjóðum í því. Við erum „stórastir“ í því. Það eru samsvarandi skólar til dæmis á Norðurlöndum — (ÖS: Íslenska er þingmálið.) Já, við erum stærstir, herra forseti, í því. Þeir eru myndarlega styrktir og eru jafnvel með skip og kvóta og eru mjög eftirsóttir skólar, bæði í Danmörku og Noregi. Nýlega fékk Fisktækniskóli Íslands 13 millj. kr. frá norrænu ráðherranefndinni til að auka samstarf milli þessara skóla undir stjórn íslenska skólans.