starfsáætlun og hugmyndir um sumarþing.

Virðulegi forseti. Ég kem hingað upp til að fagna afstöðu hv. þm. Jóns Þórs Ólafssonar sem ég tel að fleiri ættu að taka sér til fyrirmyndar. Ég man að á síðasta kjörtímabili héldum við sumarþing, það var reglan frekar en undantekning. Stundum var fundað milli jóla og nýárs, kvöld- og næturfundir voru margir og við skoruðumst aldrei undan, fögnuðum því að Alþingi væri reiðubúið að taka á stórum málum (Gripið fram í.) og vanda sig. Það er kannski til marks um þau nýju vinnubrögð sem núverandi ríkisstjórn ætlar að taka upp og skorti aðeins á á síðasta kjörtímabili, þ.e. að taka sér tíma og vanda sig.

Ég held að þjóðin eigi það skilið og vonast til þess að hv. þm. Helgi Hjörvar komi í lið með okkur hv. þm. Jóni Þór Ólafssyni og fagni því að menn séu til í að taka til hendinni á Alþingi frekar en að skorast undan því.