lyfjalög.
Hæstv. forseti. Ég kem hér upp til að lýsa því yfir að þingflokkur Samfylkingarinnar mun styðja þetta mál í þessari atkvæðagreiðslu en við munum hins vegar kalla málið inn til nefndar á milli 2. og 3. umr. í ljósi þess að í umræðum um málið sem urðu alllangar og ítarlegar kom fram mismunandi túlkun þingmanna á breytingum á 14. og 16. gr. laganna. Við teljum nauðsynlegt að farið verði yfir málið í nefndinni á milli umræðna svo það verði vel skýrt hvernig heimildum til auglýsinga á lausasölulyfjum sem og lyfseðilsskyldum lyfjum í tímaritum heilbrigðisstétta verði hagað í framtíðinni.