áætlun um meðferð og ráðstöfun aflamagns sem dregið er frá heildarafla.
Herra forseti. Ég þakka þingmanninum fyrir ræðuna. Mig langar aðeins að velta einu hér upp því að hún talaði aðeins um makrílinn. Eitt af því sem maður rekur augun í þegar maður les þetta og ég er ánægð með er að aflaheimildir í makríl fyrir 30 tonna báta og minni verði hægt að fá leigðar en ekki verði hægt að framselja þær. Á síðasta kjörtímabili settum við á fót 20 þúsund tonna leigupott ríkisins sem átti að stækka eftir auknum heildarafla.
Það sem vekur mann til umhugsunar núna er að í makrílfrumvarpinu svokallaða, sem við höfum rætt hér eina umferð, er í rauninni framsal leyfilegt. Það er ekkert annað en kvótasetning þegar talað er um að festa veiðiheimildir til sex ára og svo framlengist þær á hverju ári o.s.frv. Ég hefði að minnsta kosti viljað líta á það þannig. Mér finnst algerlega ótækt að þær séu kvótasettar.
En af því að hv. þingmaður talar svolítið um tilboðsleiðina þá hef ég haft örlítinn fyrirvara á henni og hef velt því aðeins upp hvort við getum farið blandaða leið. Ég hef áhyggjur af því að þeir sem eru litlir í greininni og jafnvel þeir sem eru nýir og ekki komnir með mjög styrkar stoðir geti því átt erfitt uppdráttar þegar þeir fara í samkeppni við hina stærri, ef við förum eingöngu uppboðsleiðina. Mig langar að spyrja hv. þingmann hvort hún fallist á að það geti verið heppilegt að fara einhvers konar blandaða leið en ekki bara eitthvert annaðhvort eða.