námslán og námsstyrkir.

Hæstv. forseti. Ég þakka hv. þingmanni ræðuna. Eins og hann sagði sjálfur þá talaði hann tæpitungulaust og það er ágætt, enda mun þetta mál hafa mikil áhrif verði það að lögum í þessum búningi. Þetta er frjálshyggjufrumvarp, ég get tekið undir það. Þó að grunnhugsunin, grundvallarhugmyndin í því sé að færa kerfið nær því sem er á Norðurlöndum, þá er útfærslan bara þannig að það gerist ekki á neinn hátt. Ég þakka fyrir þessa söguyfirferð. Ég var í háskólanum þegar breytingarnar voru gerðar árið 1991 og farið var að leggja vexti á námslán. Áður hafði verið litið svo á að vextirnir greiddust til samfélagsins í þeirri auðlegð sem felst í því að eiga vel menntað fólk. Það olli miklu fjaðrafoki og miklum mótmælum. En stúdentum vil ég kannski segja til varnar að auðvitað eru þeir að horfa á kjör sín í náminu. Það er það sem þeim stendur næst, þær aðstæður sem þeir eru að fást við í dag. Það er þá annarra sem reynslu hafa af endurgreiðslu í þessum kerfum að benda á veikleikana þar. Ég held að um leið og stúdentaráð kynnir sér betur afleiðingarnar muni það skipta um skoðun, ég vona alla vega að þau hafi vit á því.

Þá vil ég líka koma inn á vextina sem er verið að hækka gríðarlega, um allt að 2 prósentustig, ef ekki meira, auk þess (Forseti hringir.) sem vextir og verðtrygging reiknast frá því að lánið er veitt, í stað þess að byrja að leggjast á eftir (Forseti hringir.) að skuldabréfinu er lokað í lok náms. Hvaða afleiðingar telur þingmaðurinn að þetta muni hafa?