störf þingsins.
Frú forseti. Á alþjóðadegi hróssins ætla ég að byrja á að hrósa hv. þm. Steingrími J. Sigfússyni fyrir að vekja athygli hér áðan á ískyggilegri stöðu atvinnulífs og þjóðar vegna styrkingar krónunnar. Tek undir hans áhyggjur í því. En annað hrós fær líka Vegagerð ríkisins á þessum degi í tilefni af því að skilað hefur verið inn matsskýrslu til Skipulagsstofnunar um Vestfjarðarveg 60, eða kaflann á milli Bjarkarlundar og Skálaness í Reykhólahreppi. Nú er það í höndum Skipulagsstofnunar að fara yfir þessa skýrslu og hefur hún til þess fjórar vikur, eða til loka mars.
Það er svo sem ástæðulaust að rekja í einhverju löngu máli þá hörmungasögu sem þetta mál allt hefur verið. Týndur áratugur í samgöngum á Vestfjörðum sunnanverðum. Mál sem er með þvílíkum ólíkindum og hefur haldið íbúum Vestfjarða, sérstaklega á sunnanverðum Vestfjörðum, í algerum heljargreipum og allri uppbyggingu sem stendur fyrir dyrum. Þetta mál hefur verið þvílíkur flöskuháls að það verður að koma hér fram að það hlýtur að vera í algerum forgangi af hálfu framkvæmdarvaldsins og stofnunum þess að tryggja að þær vegasamgöngur sem þurfa að komast í gagnið á þessu svæði geri það. Og ekki síður að löggjafinn með sínu fjárveitingavaldi tryggi að svo geti verið því að það er ekki hægt að bíða lengur eftir þessum vegaumbótum.
