matvælaframleiðsla og loftslagsmál.
Frú forseti. Það er markmið ríkisstjórnarinnar að samrýma enn betur hagsmuni bænda sem matvælaframleiðenda, hagsmuni neytenda og hagsmuni umhverfisins, eins og hefur reyndar ítrekað komið fram hjá hæstv. sjávarútvegs- og landbúnaðarráðherra í umræðum um málið. Ég tel mikilvægt í því samhengi að landbúnaðarkerfi okkar sé skoðað sem hluti af markvissri byggða- og atvinnustefnu og að stuðningi við bændur verði þannig fyrir komið að hann stuðli að aukinni hagræðingu, framleiðniaukningu og nýsköpun í greininni. Bændur eru sjálfir best til þess fallnir að tryggja fjölbreytt úrval matvæla í sátt og samlyndi við umhverfið, að því gefnu að sá rammi sem þeir starfa innan, m.a. með tilliti til umhverfisverndarsjónarmiða, sé vel unnin og skýr og að neytendavernd sé jafnframt í hávegum höfð vegna þess að hún rúmast auðveldlega innan ramma umhverfissjónarmiða.
Virðulegi forseti. Við búum nú við stöðu sem í felast svo ótal mörg tækifæri en jafnframt áskoranir. Markmiðið hlýtur að vera að styðja við aukna fjölbreytni og nýsköpun í matvælaframleiðslunni á þann hátt að það hvetji til landverndar og sjálfbærra framleiðsluhátta. Við þurfum að nýta jákvæða efnahagshvata, þar með talið græna skatta, og ráðgjöf til að breyta álagi á landsvæði, efla skógrækt og landgræðslu og stýra beit sauðfjár og hrossa svo eitthvað sé nefnt. Við erum nefnilega í kjöraðstöðu hér til að gera hlutina rétt.