vextir og verðtrygging o.fl.
Virðulegi forseti. Ég geri grein fyrir nefndaráliti meiri hluta efnahags- og viðskiptanefndar um frumvarp til laga um breytingu á lögum um vexti og verðtyggingu, lögum um Seðlabanka Íslands, lögum um neytendalán, og lögum um fasteignalán til neytenda (lán tengd erlendum gjaldmiðlum).
Nefndarálitinu, sem er á þskj. 771, fylgir breytingartillaga á þskj. 772.
Á fund efnahags- og viðskiptanefndar komu fulltrúar fjármála- og efnahagsráðuneytis, fulltrúar Fjármálaeftirlits, fulltrúi frá Neytendasamtökum, frá Samtökum fjármálafyrirtækja og frá Seðlabanka Íslands. Að auki bárust nokkrar umsagnir sem greint er frá í álitinu.
Með frumvarpinu er lagt til að lán tengd erlendum gjaldmiðlum verði heimil með vissum takmörkunum. Lán til neytanda verði háð því að hann hafi tekjur í þeim gjaldmiðli sem lán tengist, geti staðið af sér verulegar breytingar á greiðslubyrði vegna gengis- og vaxtabreytinga eða leggi fram fjárhagslegar tryggingar sem draga verulega úr gjaldeyrisáhættu. Seðlabanka Íslands verði heimilt að setja lánveitingum skorður í þágu fjármálastöðugleika.
Í nefndarálitinu er nánar fjallað um sjö greinar frumvarpsins. Ég tel ekki ástæðu til þess að gera sérstaklega grein fyrir því í ræðustól, það stendur allt í nefndarálitinu.
Í breytingartillögu, sem fylgir hér með, eru tíu breytingartillögur sem lagðar eru til í frumvarpinu. Þær standa í breytingartillögunni og eru skýrðar að hluta til í umfjöllun í nefndarálitinu. Ég tel ekki ástæðu til þess að rekja það nánar. Það skýrir sig að mestu leyti sjálft.
Meiri hluti efnahags- og viðskiptanefndar leggur til að frumvarpið verði samþykkt sem breytingum sem gerðar eru á sérstöku þingskjali.
Hv. þm. Óli Björn Kárason var fjarverandi við afgreiðslu málsins en ritar undir álit þetta samkvæmt heimild í 4. mgr. 18. gr. starfsreglna fyrir fastanefndir Alþingis.
Þetta er gert á Alþingi, 11. maí 2017.
Undir nefndarálitið rita hv. þm. Óli Björn Kárason, formaður efnahags- og viðskiptanefndar, Vilhjálmur Bjarnason, framsögumaður, Áslaug Arna Sigurbjörnsdóttir, Brynjar Níelsson og Jón Steindór Valdimarsson. Það er meiri hluti efnahags- og viðskiptanefndar.
Að öðru leyti vísa ég til nefndarálitsins, sem hefur þinglega stöðu, og sömuleiðis til breytingartillögu.
Virðulegi forseti. Ég hef lokið máli mínu.