tillögur dómsmálaráðherra um skipun dómara við Landsrétt.

Virðulegi forseti. Ég þakka hv. þm. Birgi Ármannssyni fyrir ræðuna. Það hefur komið hérna glögglega fram að kjarni málsins er sá að hæstv. dómsmálaráðherra leggur öðruvísi mat á umsækjendur heldur en dómnefndin. Þetta er kjarni málsins. Henni var falið það hlutverk að leggja mat á hæfi umsækjendanna, en það kemur annað mat. Nefndin notar eina aðferð og hæstv. ráðherra aðra. Hæstv. ráðherra leggur svo sitt mál hér á borð Alþingis með afskaplega takmörkuðum rökstuðningi.

Það hefur komið fram að reynsla við dómarastörf ásamt öðrum þáttum vegi þyngra í mati hæstv. ráðherra heldur en gerði hjá nefndinni. Kannski aðrir þættir líka, kom að einhverju leyti fram hér áðan í ræðu hv. þingmanns.

Þannig rökstyður ráðherra inngrip sitt og í því ljósi er grundvallaratriði tímalínan í þessu. Það er mjög mikilvægt að við áttum okkur á því hvenær nákvæmlega þessi ákvörðun kom fram. Hvenær tók hæstv. dómsmálaráðherra þá ákvörðun að láta reynslu umsækjanda eða aðra þætti vega þyngra? Hvenær kom þetta fram? Var það í upphafi áður en var auglýst? Var það í miðju ferlinu einhvern tímann? Eða var það eftir á og var það kannski bara eftir á þegar málinu var lokið, umsagnir höfðu borist? Eru til einhver gögn um þetta? Hafa þessi gögn komið fyrir nefndina? Það er grundvallaratriði að við áttum okkur á því fyrir framgang málsins, bæði fyrir umsækjendur sjálfa og eins fyrir dómnefndina sem var að fjalla um málið.