framtíð íslenskrar peningastefnu, munnleg skýrsla forsætisráðherra.
Virðulegur forseti. Hv. þingmaður talaði um höfunda skýrslunnar. En mig langar aðeins til þess að koma til varnar þeim höfundum þar sem orð hv. þingmanns voru dálítil árás á faglegar forsendur höfunda vegna pólitískra tengsla. Vissulega er gott að hafa þau til hliðsjónar en það þarf líka að vera á málefnalegum nótum.
Að því sögðu væri mjög gott að fá jafningjamat á svona skýrslu, svona „peer review“, sem gert er á vísindalegum grunni. Að auki vildi ég spyrja hv. þingmann um þá stefnu að fjarlægja húsnæðisliðinn út úr vísitölu neysluverðs sem hann fór yfir í ræðu sinni, en núna er mjög mikill verðbólguþrýstingur en ekki mikill þrýstingur á hækkun húsnæðisverðs. Þannig að ef húsnæðisliðurinn er tekinn út úr vísitölunni á næstunni munu húsnæðislán hækka gríðarlega mikið út af almennri vísitölu án húsnæðisliðar.