nálgunarbann og brottvísun af heimili.
Virðulegi forseti. Ég ætla að fá tækifæri til að bæta örlitlu við og þakka hv. þm. Jóni Steindóri Valdimarssyni fyrir þetta. Það er stundum þannig þegar maður lítur á framkvæmd laga og hefur upplifað hana, sem ég gerði sjálf þegar ég starfaði sem lögreglumaður, þá heldur maður að mistökin í lögunum séu skýrari, að það sé ljóst hvað sé að þeim. Síðan les maður lögin og veltir fyrir sér: Hvernig getur framkvæmdin verið eins og hún er í dag, dómaframkvæmdin miðað við þau lög sem eru hér á borðinu?
Ég ítrekaði í greinargerð með frumvarpinu að ekki megi líta fram hjá því að röskun á friði er nægjanlegt skilyrði til að fá nálgunarbann. Það virðist oft vera, þegar ég kynnti mér dómaframkvæmdina, að sett séu strangari skilyrði en lögin kveða á um — þrátt fyrir tiltölulega lágan þröskuld ákvæðisins, sem ég breytti ekki í þessum lögum. Ég ítrekaði það enn frekar í greinargerðinni, af því að nálgunarbann á að bæta réttarstöðu þolenda heimilisofbeldis og annarra þolenda ofbeldis og ofsókna, að röskun á friði sé nægjanlegt tilefni. Ég vona að með þessum breytingum verði litið sérstaklega til þess.