meðferð krónueigna sem háðar eru sérstökum takmörkunum og gjaldeyrismál.
Forseti. Þetta mál var lagt fram 14. desember og mælt fyrir því og sú ræða tók sex eða sjö mínútur. Það átti í rauninni að rusla því í gegn vegna þess að markaðirnir gætu orðið órólegir. Nú er kominn 27. febrúar og ég velti fyrir mér hvort markaðir hafi farið á taugum á því tímabili. Það þurfti að samþykkja málið í fyrradag, ef ég kann þetta rétt, fyrir 26. febrúar, annars færi allt í bál og brand. Ég veit ekki til þess að markaðir séu við það að fara á taugum eða að allt hafi farið í bál og brand. Hvers vegna erum við að þrýsta málinu svona hratt í gegnum þingið? Fleiri spurningar hafa komið fram og sú gagnrýni, t.d. hjá hv. þm. Ólafi Ísleifssyni, að engar tölulegar upplýsingar séu í skýringum með frumvarpinu um áhrif á gengi krónunnar eða á gjaldeyrismarkaðinn. Ég spyr: Hvers vegna er ekki reynt að leggja mat á hver verstu áhrifin eða bestu áhrifin af málinu geta orðið? (Forseti hringir.) Það er engum spurningum svarað.