verslun með áfengi og tóbak o.fl.

Herra forseti. Ég þakka hv. þm. Jóni Þór Ólafssyni fyrir ræðuna. Ég efast ekkert um að hv. þingmaður meinar vel og vill að settir verði meiri peningar í forvarnir, eins og hann talar um. En mín nálgun á það er fyrst og fremst sú að reyna að gera það með beinum hætti, öðruvísi en að taka þá áhættu sem fylgir því að auka aðgengi.

Hv. þingmaðurinn kom inn á að ekki væri endilega verið að lengja tímann í afgreiðslu. Í a-lið 14. gr. frumvarpsins kemur fram að afgreiðslutími skuli ekki vera lengri en frá 11 að morgni til kl. 22 að kvöldi í smásölu. Í dag er áfengi ekki selt í smásölu á sunnudögum, en sums staðar á laugardögum. Þarna er að mínu viti verið að bæta í og ég er alveg sannfærður um að jafnvel þó að þetta standi með svipuðum hætti í lögunum núna væru sumir miklu líklegri til að nýta þann tíma sem væri í boði í lögunum vegna þess að þeir væru líklega með einhvern annan rekstur meðfram. Það er ekki farið fram á að þetta verði bara í sérverslunum heldur geri ég ráð fyrir að menn verði, sérstaklega úti á landi, með einhvern annan rekstur meðfram.

Ég held að þarna sé verið að taka óþarfa áhættu og ítreka það sem ég sagði í andsvari við hv. þingmann áðan að það væri nær að taka það litla skref að byrja á að bæta (Forseti hringir.) í lýðheilsusjóðinn áður en við förum í þetta skref.