störf þingsins.
Virðulegi forseti. Fjöldi ríkisstofnana og sveitarfélaga hafa notið aðstoðar Ríkiskaupa vegna útboða á ræstingu. Þetta er gert þrátt fyrir afar bágborið atvinnuástand víða um land og sá hópur sem sinnir þessum störfum sjálfsagt berskjaldaðri og verr undirbúinn fyrir atvinnumissi á þessum tíma en nokkur annar hópur í samfélaginu.
Virðulegi forseti. Það er ekki mikið úthald eða mannúð af hálfu ríkisstofnana og sveitarfélaga að segja upp starfsfólki í hagræðingarskyni þegar tugþúsundir landsmanna eru atvinnulausir vegna kórónuveirufaraldursins og engin störf í boði. Heilbrigðisstofnun Suðurlands hefur sagt upp starfsfólki frá og með 1. maí nk. en þá tekur fyrirtækið Sólar ehf. við ræstingunni og gott starfsfólk munstrað á galeiðu atvinnuleysisins. Það vekur athygli að tilboð fyrirtækisins hljóðar upp á 69,9 millj. kr. á ári þegar kostnaður stofnunarinnar var 138 milljónir árið 2019 og 147 milljónir árið 2020. Ég velt því fyrir mér hvernig má ná þessum kostnaði niður um 50% í útboði og á hvaða launum er starfsfólk verktakans ef heilbrigðisstofnunin getur sparað 50% af kostnaði með útboði á verkefnum lægst launaða starfsfólksins í stofnuninni? Jafnvel gæðastuðlar og tæki kalla á starfsfólk.
Þetta er ekki það eina sem veldur mér áhyggjum í því atvinnuástandi sem er í landinu í dag. Á Suðurnesjum er 25% atvinnuleysi, þúsundir atvinnulausar. Þrátt fyrir það hefur fiskvinnsla á svæðinu nýlega flutt inn 40 pólska starfsmenn til að vinna fisk í stað þess að freista þess að fá starfsmenn á atvinnuleysisskrá á Suðurnesjum. Getur verið að það sé vegna þess að fyrirtækið getur lagt farandverkafólki til húsnæði og skjól sem er í eigu þess sem ekki þarf fyrir starfsmenn sem búa á Suðurnesjum?
Virðulegur forseti. Það gengur yfir mig hvernig fyrirtæki og stofnanir ganga fram með uppsögnum gagnvart atvinnulausu fólki með þröngum eigin hagsmunum eða hagnaðarvon á tímum atvinnuleysis og kórónuveirufaraldurs.
