fjármálafyrirtæki.

Herra forseti. Ég mæli hér fyrir nefndaráliti meiri hluta efnahags- og viðskiptanefndar fyrir hönd framsögumanns, hv. þm. Brynjar Níelssonar, sem er forfallaður. Nefndin fékk gesti á sinn fund eins og hefðbundið er og kemur fram í nefndarálitinu, auk umsagna frá tveimur aðilum.

Með frumvarpinu er lagt til að nýtt ákvæði bætist við lög um fjármálafyrirtæki þess efnis að bein og óbein stöðutaka kerfislega mikilvægra viðskiptabanka og sparisjóða í fjármálagerningum, að frátöldum skuldabréfum utan veltubókar, og hrávöru verði takmörkuð þannig að samanlögð eiginfjárþörf bankans eða sparisjóðsins vegna stöðutökunnar megi ekki vera umfram 15% af eiginfjárgrunni hans. Frumvarpinu er ætlað að hrinda í framkvæmd tillögu í hvítbók um framtíðarsýn fyrir fjármálakerfið um afmörkun varnarlínu milli viðskipta- og fjárfestingarbankastarfsemi.

Eins og kemur fram í nefndarálitinu hafa flest vestræn ríki sett ákveðnar varnarlínur á milli viðskiptabanka- og fjárfestingarbankastarfsemi innan sömu stofnunar eftir fjármálakreppuna. Með samþykkt frumvarpsins væri áhættumikil fjárfestingarbankastarfsemi takmörkuð án þess að lagðar yrðu of íþyngjandi kvaðir á starfsemina. Bann við því að stöðutaka fari umfram 15% af eiginfjárgrunni heftir augljóslega vöxt áhættumikillar fjárfestingarbankastarfsemi kerfislega mikilvægra banka án þess þó að raska núverandi starfsemi þeirra og gefur þeim töluvert svigrúm.

Í alþjóðlegum samanburði eru íslenskir bankar mjög litlir og því skiptir miklu að þeir geti starfað með eins hagkvæmum hætti og hægt er. Kvaðir eða takmarkanir sem eru settar til að draga úr áhættu verða að taka mið af því þannig að ekki sé dregið úr stærðarhagkvæmni og þjónustuframboði kerfislega mikilvægra viðskiptabanka eða möguleikum til áhættudreifingar með fjölbreyttari tekjustofnum meira en nauðsynlegt er.

Þá er vert að benda á í lokin að undanfarin ár hefur verið ráðist í róttækar breytingar á áhættuvörnum íslenska fjármálakerfisins með innleiðingu nýrra laga og reglna og aukins eftirlits fjármálaeftirlits Seðlabanka Íslands. Allt hefur þetta miðast við það að geta íslenskra lánastofnana til að mæta áföllum verði hlutfallslega töluvert meiri eða betri en víðast annars staðar í þeim löndum sem við berum okkur saman við.

Að þessu sögðu leggur meiri hlutinn til að frumvarpið verði samþykkt óbreytt.

Undir nefndarálitið skrifa hv. þingmenn Óli Björn Kárason, Brynjar Níelsson, framsögumaður málsins, Bryndís Haraldsdóttir, Ólafur Þór Gunnarsson og Þórarinn Ingi Pétursson.