útlendingar og atvinnuréttindi útlendinga.

Herra forseti. Tilefni þess að ég kem hérna upp eru orð sem hv. þingmaður lét falla um fjölmiðil, lítinn einkarekinn fjölmiðil, sem er Útvarp Saga. Þetta er í annað sinn sem ég verð vitni að því að hann telur við hæfi að hnjóða í lítið, einkarekið fyrirtæki úr ræðustól Alþingis. Ég vil segja við hv. þingmann í fyllstu vinsemd að ég tel þetta ekki með öllu viðeigandi að nota ræðustól Alþingis til að reka hornin hér í íslensk einkafyrirtæki sem þurfa náttúrlega að berjast fyrir lífi sínu dag hvern í mjög erfiðu og krefjandi umhverfi og fyrir það eitt að hv. þingmanni líki ekki einhverjar skoðanir sem þar koma fram. Það stendur að vísu þannig á að það koma mjög margar skoðanir fram á þessari útvarpsstöð vegna þess að það er opinn símatími sem mjög margir nýta sér til að koma sjónarmiðum sínum á framfæri, sem þeir myndu kannski ekki geta gert á mörgum öðrum fjölmiðlum. En ég segi þetta bara við hv. þingmann í allra mestu vinsemd.