hertar sóttvarnareglur, munnleg skýrsla heilbrigðisráðherra. - Ein umræða.
Herra forseti. Ég þakka hæstv. heilbrigðisráðherra fyrir skýrsluna og tel mjög mikilvægt að Alþingi sé þétt við hlið ráðherra og sé vel upplýst. Angela Merkel, kanslari Þýskalands, mætti t.d. í þingið beint eftir kynningarfund þegar reglum var breytt þar til að ræða strax við þingið áður en farið var í viðtöl við fjölmiðla einmitt til þess að löggjafinn væri vel upplýstur og það væri ekki upplýsingaóreiða og allir gætu gengið í takt. Ég held að það sé mjög mikilvægt.
Ég vil spyrja hæstv. ráðherra í fyrstu spurningu: Telur hún að eftirlit stjórnvalda með ferðafólki sem hingað hefur komið og á að vera í sóttkví, fólki búsettu hér sem og ferðafólki, hafi verið fullnægjandi? Hvernig hefur því verið háttað? Hefur einhver vöktun verið t.d. í Leifsstöð varðandi það hvernig fólk ferðast þaðan eða yfirleitt vöktun á því hvar fólk heldur til þegar heim er komið eða á gististaði?